Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
POLITIKE
"Arrestimi i sotëm i Beqajt, një show", Këlliçi: Kolegët e Erionit në SPAK vijojnë amnistinë për të dhe Grupin e Strukturuar Kriminal 5D
M.B.Përditësimi i fundit 4 Korrik 2024, 17:27
Belind Këlliçi
TIRANA- Anëtari i kryesisë së Partisë Demokratike, Belind Këlliç ka dalë sot në një deklaratë për mediat ku tha se dje Gjykata e Apelit Kundër Krimit të Organizuar dhe Korrupsionit e ka konsideruar, në vendim, kompaninë 5D Konstruksion dhe drejtorët e Erion Veliajt, si një Grup të Strukturuar Kriminal. Këlliçi tha se ky vendim është një kthesë vendimtare për fatet e hetimit dhe për zbardhjen e së vërtetës të hajdutëve në bashkinë Tiranë.
Ai ka shtuar se kolegët e kryebashkiakut Erion Veliaj në SPAK e kanë të kotë edhe show-n e sotëm, sipas tij me arrestimin e ish-minitrit të Shëndetësisë, Ilir Beqaj, i cili në vend që të arrestohej për abuzimin, vjedhjen e qindra milionë eurove dhe shkatërrimin e sistemit shëndetësor në Shqipëri, u arrestua, sipas tij, për disa fatura restorantesh dhe vetëm për të hequr vëmendjen nga vendimi i djeshëm për dosjen 5D.
DEKLARATA E ANETARIT TE KRYESISE, BELIND KËLLIÇI:
Ditën e djeshme, u informuam nga mediat se Gjykata e Apelit Kundër Krimit të Organizuar dhe Korrupsionit, në një vendim shumë të qartë të sajin, e ka konsideruar kompaninë 5D Konstruksion dhe drejtorët e Erion Veliajt, si një Grup të Strukturuar Kriminal.
Këta drejtorë, vetëm me kompaninë 5D, kanë vjedhur të paktën 30 milionë euro tendera publikë, përmes 45 proçedurave tenderuese, në harkun kohor të 7 viteve.
Ky është një fakt që ne e kemi bërë publik dhe kallëzuar në SPAK që në muajin prill të vitit 2023, vijojmë e përsërisim prej 10 muajsh nga kjo foltore si dhe prej 15 javësh kjo është kryefjala e protestave para Bashkisë Tiranë.
Fakti që Gjykata i kërkon thellimin e hetimeve prokurorëve të SPAK, dëshmon fatkeqësisht atë që Partia Demokratike ka thënë prej kohësh: Kjo është drejtësi me regji!
Ky vendim është një kthesë vendimtare për fatet e hetimit dhe për zbardhjen e së vërtetës të hajdutëve në bashkinë Tiranë. Nuk ka shqiptar që e beson se Erion Veliaj nuk dinte gjë dhe se drejtorët hajdutëronin pa dijeninë e tij.
Gjykata në vendimin e saj është shprehur se përpos trajtimit të dosjes 5D si një Grup i Strukturuar Kriminal, Prokuroria e Posaçme (SPAK) duhe të hetojë edhe deklarimet e shtetases Jona Bejko, e cila e cilësonte ‘lali erin’ si pronarin faktik të hotelit 50 milionë euro në Durrës.
Pra thënë shkurt e qartë, ish zv. Kryeministri Arben Ahmetaj e cilëson Erion Veliajn si pronarin faktik të inceneratorit Tiranë, punonjësja e 5D Jona Bejko e cilëson Erion Veliajn si pronarin faktik të hotelit 50 milionë euro në Durrës, kurse Altin Dumani dhe SPAK, ende refuzojnë të bëjnë detyrën, por mbi të gjitha refuzojnë të zbatojnë edhe vendimet e Gjykatës Speciale Kundër Krimit të Organizuar dhe Korrupsionit.
Kolegët e Erionit në SPAK e kanë të kotë edhe show-n e sotëm me Ilir Beqen, i cili në vend që të arrestohej për abuzimin, vjedhjen e qindra milionë eurove dhe shkatërrimin e sistemit shëndetësor në Shqipëri, u arrestua pikërisht sot për disa fatura restorantesh dhe vetëm për të hequr vëmendjen nga vendimi i djeshëm për dosjen 5D dhe kreun e këtij Grupi të Strukturuar Kriminal Erion Veliaj.
Kolegët e Erionit e kanë të kotë, pasi Partia Demokratike dhe unë personalisht, jemi të vendosur të mos amnistojmë kurrë hajdutin Erion Veliaj dhe shtabin e tij elektoral të 14 Majit 2023.
Nuk ka drejtësi të pjeshme, drejtësi me regji, por vetëm drejtësi që i sheh të gjithë të barabartë përpara ligjit.
Thirrja ime në emër edhe të qyetarëve që besojnë se shteti është aty për të mbrojtur qyetarin dhe jo hajdutin me pushtet është:
Bashkohuni nesër me protestën e qytetarëve tek bashkia Tiranë, në orën 11:00, siç bëjmë tashmë prej 15 javësh.
Ne kemi vetëm një synim: Drejtësi për qytetarët, shpëtim për Tiranën dhe hajdutët para ligjit.
