Protesta e studentëve në Universitetin “Aleksandër Moisiu” në Durrës është shfaqur edhe në ambientet e kam...
POLITIKE
Rama fut inteligjencën artificiale në universitete: Pedagogët dhe studentët ta përqafojnë këtë realitet të ri
PiranjatPërditësimi i fundit 1 Tetor 2025, 15:06
Kryeministri Edi Rama deklaroi se mbështetja për gratë dhe vajzat është një nga investimet më të vlefshme për të ardhmen e vendit, duke e cilësuar si një realitet tashmë të pamohueshëm që ato janë më përpara se burrat në shumë drejtime. Deklarata u bë gjatë një aktiviteti në Universitetin Politeknik të Tiranës, ku u firmos një marrëveshje mes këtij institucioni dhe Ministrisë së Infrastrukturës dhe Energjisë për mbështetjen e studentëve nëpërmjet praktikave të paguara të punës.
Në fjalën e tij, kreu i qeverisë theksoi rëndësinë që ka fuqizimi i grave dhe vajzave në fusha si shkenca, teknologjia dhe inxhinieria, duke shtuar se shpesh janë më të motivuara dhe më të përkushtuara se sa burrat.
“Shpresoj që ky investim, qoftë edhe për inat, t’i motivojë më shumë burrat. Ata janë më të rehatuar në mënyrën e të menduarit, ndërsa gratë dhe vajzat janë në kërkim të vazhdueshëm të sfidave. Prandaj, si përfaqësues i gjinisë më të dobët, e them me bindje se gratë janë më përpara se ne. Nuk na mbetet veçse ta pranojmë këtë fakt me dinjitet dhe të përpiqemi të jemi bashkudhëtarë të denjë të tyre,” u shpreh Rama.
Ndër të tjera, ai përmendi edhe nevojën për përfshirjen e Inteligjencës Artificiale në proceset mësimore dhe kërkimore të universiteteve. Sipas Ramës, qeveria do të parashikojë mbështetje buxhetore që kjo fushë të zërë vendin që meriton në arsimin e lartë.
“Do të përgatitemi që në buxhetin e vitit të ardhshëm, por edhe në vitet në vijim, të mbështesim të gjitha iniciativat që vlejnë për zhvillimin e komponentit të Inteligjencës Artificiale në universitetet tona. I bëj thirrje pedagogëve dhe studentëve që të angazhohen sa më shumë dhe ta përqafojnë këtë realitet të ri,” tha ndër të tjera kryeministri Rama.
