Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
POLITIKE
Deputetja demokrate në Asamblenë Parlamentare të Këshillit të Europës: Shqipëria është kthyer në një problem europian!
PiranjatPërditësimi i fundit 3 Tetor 2025, 14:18
Deputetja Albana Vokshi ka ngritur shqetësimin për situatën e rëndë të klimës së biznesit në Shqipëri, duke iu referuar raportit të fundit të Departamentit Amerikan të Shtetit. Gjatë fjalës së saj në Asamblenë Parlamentare të Këshillit të Europës (PACE), Vokshi theksoi se korrupsioni sistemik, pastrimi i parave nga trafiku i drogës dhe një gjyqësor i dobët kanë krijuar një ambient ku investimet e huaja pengohen dhe bizneset janë të shtrënguara nga administrata dhe grupet kriminale.
Vokshi vuri në dukje ndërtimin masiv të resorteve luksoze dhe kullave në qytetet kryesore të vendit, si Tiranë, Durrës, Vlorë, Sarandë dhe Himarë, ku mbi 40 mijë apartamente janë të pabanuara dhe çmimet arrijnë deri në 10 mijë euro për metër katror. Sipas saj, këto ndërtime shërbejnë kryesisht si mjete për pastrimin e parave të paligjshme.
Fjala e Albana Vokshi, në Asamblenë Parlamentare të Këshillit të Europës (PACE):
I nderuar President,
Do të flas mbi raportet ndërkombëtare në lidhje me situatën në Shqipëri:
Vetëm pak ditë më parë, Departamenti i Shtetit i SHBA publikoi raportin e vitit 2025 për klimën e biznesit në Shqipëri. Gjetjet e raportit janë alarmante: Shqipëria mbetet e goditur nga korrupsioni sistemik dhe nga një fluks i madh fondesh të paligjshme, kryesisht nga trafiku i drogës, që shtrembërojnë konkurrencën dhe pengojnë investimet e huaja. Korrupsioni në prokurime, përdorimi abuziv i kontratave PPP, pasiguria e të drejtave të pronësisë dhe një gjyqësor i dobët kanë krijuar një mjedis ku bizneset përballen me presione nga administrata publike por edhe nga grupet kriminale.
Nëse vizitoni Tiranën, apo Vlorën, apo Durrësin, Sarandën dhe Himarën, do të shihni resorte luksoze dhe kulla të larta në vend të lagjeve historike, teatrove dhe stadiumeve. Duken moderne, të këndshme, por mbi 40 mijë apartamente janë bosh. Çmimet nga 3 mijë, 5 mijë deri në 10 mijë euro për metër katror tregojnë të vërtetën: këto kulla nuk janë për shqiptarët, por janë mjete për pastrimin e parave të pista.
Titujt ndërkombëtarë e konfirmojnë këtë. Gazeta Caras y Caretas në Uruguaj raportoi së fundi për shkatërrimin e një klani të fuqishëm shqiptar që trafikonte kokainë nga Amerika e Jugut drejt Europës, duke pastruar miliarda përmes ndërtimit dhe madje duke ndikuar edhe në çmimet e drogës në tregun ndërkombëtar. Ajo që është shqetësuese është bashkëpunimi i qeverisë dhe institucioneve shtetërore me krimin e organizuar, duke e shndërruar problemin e Shqipërisë në një problem europian e më gjerë.
Europa nuk mund të përballojë që të ketë një strehë të sigurt për krimin e organizuar. Pa veprime vendimtare, Shqipëria rrezikon trazira sociale, përplasje të dhunshme mes klaneve, emigrim masiv dhe eksport të pasigurisë në gjithë Europën.
Prandaj, i bëj thirrje kësaj Asambleje të dërgojë një mesazh të qartë dhe të fortë: korrupsioni, pastrimi i parave, mbytja e medias dhe manipulimi zgjedhor nuk do të tolerohen.
Dhe ju nxis të përdorni çdo instrument të mundshëm për ta detyruar qeverinë shqiptare të luftojë krimin e organizuar dhe të mbrojë demokracinë.
