Detaje të reja dhe zhvillime të bujshme vijnë nga hetimet për përplasjen me armë në Maliq, ku mbeti i vrarë një e...
POLITIKE
Diella në dritë të Diellit
PiranjatPërditësimi i fundit 15 Shtator 2025, 09:05
Nga Klodian Tomorri
Një nga gjërat që më të habitshme dhe më të pashpjegueshme në këtë botë, është fuqia e pafundme e propagandës.
Kjo mund të kuptohet në shoqëritë e mbyllura. Mund të kuptohej para 100 viteve, kur informacioni ishte i kontrolluar. Por sot që informacioni dhe dija janë demokratizuar në çdo cep të planetit, ky mbetet një mister i madh.
Shikoni ça bëhet! Del kryeministri i Shqipërisë dhe thotë ne kemi shpikur të parët në botë, një soft i cili do të menaxhojë të gjithë tenderat. Kjo tani merret dhe bëhet lajm në të gjitha mediat shqiptare, por edhe në mediat më të mëdha të botës.
Niveli i dembilizmit kolektiv arrin majat, kur BBC-ja bën kronikë që qeveria britanike duhet të kopjojë Shqipërinë dhe të fusë inteligjencën artificiale tek procedurat e prokurimit.
Asnjëri nuk bën disa pyetje shumë të thjeshta.
Ore sa e avancuar është Shqipëria në teknologjinë e informacionit?
Çfarë niveli inovacioni ka ekonomia shqiptare?
Si ka mundësi, që nuk e shpiku Amerika këtë softin dhe të zhdukte korrupsionin në tendera dhe qeverisje.
Si ka mundësi, që Mirlinda e AKSHI-t, e cila është ekzekutivja e vetme në botë që nxorri të gjitha të dhënat e qytetareve të saj në pazarin e gjësë së gjallë, gjunjëzoi Bill Gates-in, Zuckerbergun, Elon Muskun, Sam Altmanin etj etj?
Si ka mundësi, që Shqipëria e Edi Ramës, e cila nuk prodhon dot as stilolapsa dhe shkrepëse, arrin të bëjë shpikjen më të madhe të shekullit duke i dhënë zgjidhje problemit më të madh të qeverisjes në botë?
Dhe e fundit fare. A mund të shpikë një nga qeveritë më të korruptuara të Europës, ilaçin e korrupsionit?
Askush nuk i bën këto pyetje. Se ne i kemi shndërruar në idhuj këto mediat e huaja. Por ja këtë nivel kanë dhe këta. Nuk është se vijnë nga Marsi.
Tani, kjo historia e Diellës është shumë e thjeshtë. E para u hodh për propagandë, që qeveria dhe kryeministri të kapnin disa tituj në mediat botërore. E dyta dhe më e rëndësishmja, ka një bisht të madh nga pas.
Është një projekt nja 180 milionë euro, që po negociohet me Bankën Botërore dhe Bashkimin Europian për investime në IT. Deri para ca kohësh e pati negociuar ai Myzyri i KPP-së, por pasi e mori SPAK-u dhe e futi në dollap, ngeci pak.
Prandaj po bëhet kjo. Do rruajnë ato 180 milionë eurot. Dhe në fund bëhet dhe një pyetje tjetër.
Linda e AKSHI-t, ça di të bëjë më mirë?
Të shpikë gjëra, që mahnisin botën apo të rruaje lekë?
Se kuzhinieri gatuan vetëm gjellën që di të bëjë. Dhe kjo vetëm këtë të dytën di të bëjë mirë.
Të besosh që bëri shpikjen e shekullit një institucion, ku po merren njerëzit peng, kjo është fuqia e jashtëzakonshme e propagandës.
