Detaje të reja kanë dalë në dritë nga ngjarja e rëndë e regjistruar mbrëmjen e 20 tetorit në zonën e Komun&e...
POLITIKE
Ditmir Bushati “godet” PS-në: Të rinjtë kërkojnë një Shqipëri të re, dhuna dhe kërcënimet nuk e shuajnë revoltën!
PiranjatPërditësimi i fundit 21 Tetor 2026, 12:35
Ish-ministri i Jashtëm, Ditmir Bushati ka reaguar në lidhje me protestat studentore që kanë përfshirë vendin. Përmes një postimi në rrjetet sociale, Bushati shpreheht se rinia shqiptare ka qenë historikisht në pararojë të ndryshimeve të mëdha në vend.
Sipas Bushatit, prej muajsh të rinjtë janë rikthyer në sheshe me kërkesa për ndryshim, duke shprehur pakënaqësinë ndaj korrupsionit, krimit të organizuar, përqendrimit të pushtetit dhe vështirësive ekonomike që përballojnë qytetarët.
Ish-ministri i Jashtëm kritikon mënyrën se si, janë trajtuar kërkesat e protestuesve, duke kundërshtuar kështu edhe gjuhën kërcënuese ndaj tyre. Në lidhje me këtë, Bushati rendit përdorimin e shkopinjve të gomës, gazit lotsjellës dhe ujit me presion si elemente, për të cilët thotë se nuk mund ta ndalin revoltën e një brezi që kërkon ndryshim.
Ai kundërshton gjithashtu argumentet që ia atribuojnë protestat ndikimit të forcave të huaja, duke theksuar se shoqëria shqiptare është thellësisht pro-amerikane dhe orientimi i saj është evropian. Në fund, ai thotë se Partia Socialiste duhet të dallojë atë që i përket një momenti politik nga ajo që i detyrohet Shqipërisë.
Ditmir Bushati: Si qytetar jam kundër akteve të dhunës dhe kundër brutalitetit të policisë. Kur Shqipëria është gjendur përpara një kthese të madhe, të rinjtë kanë ditur ti paraprijnë ndryshimit. E bënë këtë në vitin 1990. U përpoqën në vitin 1996. Por kërkesat e tyre u shpërfillën, çka paralajmëroi tmerrin e vitit 1997. Prej muajsh rinia shqiptare është rikthyer në sheshe duke shpalosur një pasion që rreh veç në gjokset e këtij brezi. Nuk është gjithmonë i shprehur qartë, e rrallëherë është i disiplinuar.
Rinia kërkon një Shqipëri të re, sepse refuzon normalizimin e korrupsionit dhe krimit të organizuar në jetën publike; personalizimin e tejskajshëm të pushtetit që e trajton atdheun si plaçkë; modelin e kapitalizmit grabitqar që prodhon kosto të papërballueshme jetese, braktisje të vendit dhe polarizim shoqëror.
Injorimi i kërkesave të të rinjve dhe strategjia e përçarjes mes flamingove dhe sorrave dështoi. Nuk do të funksionojë përpjekja për ti ndarë të rinjtë në të mirë e të këqinj. As gjuha kërcënuese ndaj tyre, prindërve dhe medias. Shkopat e gomës, gazi lotsjellës, uji i hedhur me presion, apo motivimi financiar i policëve nuk e shuan dot revoltën e një brezi që di për shumë skandale dhe jeton mes vështirësive të panumërta. Aq më pak kërkimi i fajtorëve te ‘forcat e huaja’ në një shoqëri europiane, thellësisht pro-amerikane.
Të rinjtë kërkojnë një Shqipëri të re. Tani është detyrë e mësuesve, prindërve, sipërmarrësve, punëtorëve, akademikëve, dhe po, para së gjithash, e Partisë Socialiste që të ngrihet në lartësinë që e thërret koha. Partia Socialiste duhet të dallojë atë që i përket një momenti politik nga ajo që i detyrohet Shqipërisë.
