“E rrëmbyen në mes të ditës si bandat kriminale!" Xhixho për arrestimin e Metës: Dhuna e ushtruar nuk do të amnistohet

TIRANA- Zëvendës presidentja e Partisë së Lirisë, Erisa Xhixho, ka reaguar sërish në rrjetet sociale në lidhje me arrestimin e Ilir Metës. Xhixho thotë se Meta u rrëmbye në mes të ditës dhe se dhuna e ushtruar dje, të cilën e panë të gjithë shqiptarët, nuk do të amnistohet. Ajo shtoi se deklarata e ministrit të Brendshëm ishte i turpshëm.

Postimi i Erisa Xhixhos:

Terroristët e Edi Ramës, që rrëmbyen dje ish-presidentin e republikës në mes të ditës, njësoj si bandat kriminale me të cilat bashkëpunon ngushtë qeveria, kanë të gjithë emër dhe fytyrë. Dhuna e ushtruar dje, të cilën e panë të gjithë shqiptarët, nuk do të amnistohet. Anëtarëve të kësaj skuadre terroriste, që të fshehur pas maskave ekzekutuan urdhrat e kryeministrit dhe pseudodrejtësisë së vënë në shërbim të tij, do t’u jepet ndëshkimi i duhur!

Ky akt terrorist ndaj një individi që ka ushtruar funksionet më të larta publike në Shqipëri prej 30 vitesh, duke mos iu shmangur në asnjë moment përgjegjësive dhe drejtësisë, tregoi edhe njëherë se kemi shtet policor dhe jo ligjor. Reagimi i ministrit të Brendshëm, i cili mbron këta banditë me uniformë e maska në fytyrë që guxojnë të godasin Presidentin e Partisë së Lirisë është i turpshëm dhe kjo ngjarje e rëndë turpëron Shqipërinë.

erisa xhixho