"Edhe rezultatin e 2021 nuk e arrijnë më!" Zgjedhjet e shkuara/ Rama për opozitën: Atëherë ishin më të organizuar sesa janë sot

TIRANA- Kryeministri Edi Rama ka komentuar dhe krahasuar sot fushatën e këtij viti me atë të vitit 2021 duke u ndalur veçanërisht te opozita. I ftuar në emisionin "Repolitix", Rama u pyet për faktin se ndryshe nga zgjedhjet e kaluara, ndërkombëtarët janë më të heshtur. Për këtë Rama tha se në 2021 ka qenë tjetër atmosferë dhe sipas tij më 11 maj, opozita nuk do ta marrë kurrë rezultatin e zgjedhjeve të shkuara. 

"2021 ka pasur tjetër atmosferë, tjetër tension. Ata ishin të bindur që do të fitonin, të bindur se që ne do të humbisnim. Ishin më të organizuar sesa janë sot. Edhe rezultatin e 2021 nuk e arrijnë më.

Në fletën e votimit është subjekti dhe lideri i partisë. Nga ana tjetër, në të gjithë planetin demokratik, vetvetiu fushata qendërzohet te udhëheqësit e alternativat.

Nuk është një zgjedhje. Është ndërtuar edhe mbi bazën e leximit të publikut në kuptimin e anketimeve që ne bëjmë edhe me fokus-grupet që bëjmë dhe është arritur në këtë përfundim që duhet të jenë të dy emrat së bashku siç janë në fletën e votimit", tha Rama.