Erjon Vishkulli, i riu që mbeti i plagosur në sy nga një plumb gome gjatë protestës, ka pësuar hemorragji gjatë ndërhy...
POLITIKE
I riu u godit me plumb gome në sy, reagon Bardhi: Kushdo që ka kryer këtë akt të rëndë duhet të identifikohet
PiranjatPërditësimi i fundit 24 Tetor 2026, 21:48
Kryetari i Grupit Parlamentar të Partisë Demokratike, Gazment Bardhi, ka reaguar ashpër pas plagosjes së Erion Vishkullit, i cili u godit me plumb gome në syrin e majtë gjatë protestës në Tiranë. Bardhi i ka bërë thirrje Prokurorisë së Tiranës të nisë menjëherë hetimet për identifikimin e personit që dha urdhrin dhe efektivit që qëlloi të riun, duke kërkuar që përgjegjësit të përballen me drejtësinë pa vonesa.
Sipas tij, Vishkulli po lufton në sallën e operacionit për të shpëtuar shikimin në syrin e majtë, ndërsa deputeti e cilësoi ngjarjen si një akt të rëndë që nuk mund të justifikohet në asnjë rrethanë. Bardhi theksoi se Erion Vishkulli është një i ri patriot, tifoz i Kombëtares shqiptare dhe i Elbasanit, i cili kishte dalë në protestë për një Shqipëri më të mirë. Ai nënvizoi se asnjë veprim i të riut nuk mund të justifikojë një dhunë të tillë.
Bardhi: Prokuroria e Tiranës duhet të veprojë menjëherë, pa asnjë vonesë, për të identifikuar urdhëruesin dhe autorin e këtij akti makabër, të qëllimit me plumb në sy ndaj një të riu, i cili në këto momente po lufton në sallën e operacionit për të shpëtuar shikimin në syrin e majtë.
Kushdo që ka urdhëruar dhe kushdo që ka kryer këtë akt të rëndë duhet të identifikohet, të vihet përpara drejtësisë dhe të arrestohet pa asnjë vonesë, në përputhje me ligjin. Nesër mund të jetë tepër vonë. Prokuroria dhe organet ligjzbatuese duhet të dëshmojnë me veprime konkrete se jeta dhe shëndeti i çdo qytetari janë të shenjta dhe se askush nuk është mbi ligjin kur cenon të drejtat dhe integritetin fizik të një të riu!
Erion Vishkuli është një i ri patriot, tifoz ultras i Kombëtares dhe i Elbasanit, i cili protestonte për një Shqipëri më të mirë. Ai nuk ka kryer asnjë krim dhe nuk ka bërë asnjë faj që të justifikojë një dhunë të tillë. Asnjë rrethanë nuk mund të justifikojë një akt të tillë makabër.
Në këto momente të rënda, lutemi të gjithë për shëndetin e Erionit dhe për rikuperimin e tij të plotë. Jemi pranë tij dhe familjes së tij, me solidaritet dhe mbështetje të pakushtëzuar.
Drejtësi për Erionin! Asnjë vonesë, asnjë tolerim, askush mbi ligjin!
