Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
POLITIKE
"Keqqeverisja po e mban Shqipërinë larg Europës"/ Erisa Xhixho: 64 vjet për të arritur standardet e qeverisjes së BE-së
PiranjatPërditësimi i fundit 17 Tetor 2025, 13:39
Deputetja e PL, Erisa Xhixho përmes një postimi në rrjetet sociale, shprehet se Shqipëria është e papërgatitur për të përmbushur kërkesat e Bashkimit Europian dhe se premtoni "Shqipëria europiane deri në 2030" është vetëm një propagandë elektorale.
Sipas Institutit të Vjenës për Studime Ndërkombëtare, Xhixho citoi se Shqipëria do të ketë nevojë për 64 vjet për të arritur standardet e qeverisjes së BE-së, ndërsa për krahasim, Kosova ka nevojë vetëm për 26 vjet.
Deputetja theksoi se Shqipëria ka mbetur pas në fusha të tilla si ekonomia (53 vite), shëndetësia (39 vite) dhe infrastruktura (100 vite), dhe se korrupsioni dhe lidhjet me krimin e organizuar janë bërë pengesë e madhe për përparimin e vendit. Ajo shtoi se mungesa e mundësive ekonomike po detyron qytetarët të emigrojnë, duke theksuar se integrimi europian duhet të jetë një proces serioz për përmirësimin e jetës së qytetarëve dhe jo një mjet propagande për fushata.
Postimi:
Keqqeverisja po e mban Shqipërinë larg Europës.
Shqipëria vazhdon të mbetet pas jo vetëm në raport me vendet e BE-së, por edhe në krahasim me vendet e rajonit në procesin e integrimit europian — dhe shkaku është i qartë: mungesa e qeverisjes së mirë.
Sipas Institutit të Vjenës për Studime Ndërkombëtare, Shqipërisë do t’i duhen të paktën 64 vite për të arritur standardin e qeverisjes që kërkon Bashkimi Europian. Premtimi “Shqipëria europiane deri në 2030” është thjesht propagandë elektorale. Në realitet, qeverisja shqiptare nuk arrin dot as ritmin e Kosovës, e cila ka nevojë për vetëm 26 vite për të përmbushur këto standarde. Prapambetja është e thellë edhe në fusha të tjera: • Ekonomia: 53 vite për të arritur standardet e BE-së • Sistemi social: 71 vite • Shëndetësia: 39 vite • Mjedisi & infrastruktura: 100 vite Korrupsioni i përhapur në çdo nivel të shtetit dhe lidhjet me krimin e organizuar e kanë kthyer Shqipërinë në një lavatriçe për pastrimin e parave të drogës.
Ndërkohë, pamundësia ekonomike, mungesa e shërbimeve dhe e meritokracisë po i detyrojnë qytetarët të largohen. Integrimi europian nuk është dekor për fushata – por një proces që duhet të ndërtojë standarde për qytetarët shqiptarë.
Ndërsa kryeministri flet për “pasaportën europiane”, qytetarët po emigrojnë çdo ditë sepse realiteti me të cilin përballen çdo ditë është shumë larg standardeve të BE-së – në çdo shërbim publik, në çdo aspekt të jetës.
