Të ardhurat që shteti siguron nga dhënia me qira e pasurive të sekuestruara dhe të konfiskuara kanë shënuar një rritje t...
POLITIKE
Kërcënimet ndaj pronarit të MCN TV Endri Meksi, reagon Jorida Tabaku: Sulmet ndaj gazetarëve po kthehen në kulturë
PiranjatPërditësimi i fundit 30 Mars 2026, 09:37
Përmes një postimi në rrjetet sociale, Tabaku kërkon nga Policia e Shtetit dhe Prokuroria që të marrin masa për garantimin e sigurisë dhe zbardhjen e plotë të ngjarjes. “Kërcënimi i përsëritur ndaj pronarit të MCN TV nuk është thjesht një incident i izoluar. Është një rast i përsëritur që vjen në një moment kur kultura e sulmit ndaj gazetarëve ka arritur nivele të reja”, shprehet ajo.
Sipas saj, klima ndaj medias është përkeqësuar, duke krijuar terren për intimidim dhe presion. “Ky mjedis toksik, ku gjuha politike ndaj medias është denigruese dhe ku kritika trajtohet si armik, krijon kushtet që kërcënimet të bëhen të mundshme”, thekson Tabaku.
Deputetja e opozitës e cilëson situatën si një problem që shkon përtej një rasti individual. “Ky nuk është vetëm një test për organet e drejtësisë për të hetuar dhe ndëshkuar çdo kërcënim. Është një test për vetë politikën dhe mënyrën si ajo e trajton fjalën e lirë”, deklaron ajo.
Në reagimin e saj, Tabaku kërkon veprim të menjëhershëm nga institucionet. “I bëj thirrje Policisë së Shtetit dhe organeve të drejtësisë të marrin masa, të garantojnë sigurinë dhe të vendosin përpara përgjegjësisë çdo autor”, shprehet ajo.
Ajo paralajmëron se liria e medias nuk cenohet vetëm përmes dhunës fizike, por edhe përmes presionit dhe gjuhës publike. “Shqipëria nuk mund të ecë drejt Europës me një klimë frike ndaj medias dhe kjo klimë duhet të marrë fund”, përfundon Tabaku.
