"Krenaria e tallavasë së integrimit!" Meta ironizon Ramën: Konvergjenca me BE-në mund të bëhet me këto ritme kur ai të bëhet 110-vjeç dhe t'i afrohet mandatit të 20-të

TIRANA- Presidenti i Partisë së Lirisë Ilir Meta ka bërë një postim në rrjetet sociale ku ironizon kryeministrin Edi Rama kur ky i fundit shpreh krenarinë për ecurinë e procesit të integrimit. Meta shkruan se Shqipëria është kaq mbrapa sepse sipas tij, ka Ramën që dështimin do ta shesë si arritje dhe papërgjegjshmërinë, shton ai, e ka në AND-në e tij, pasi pushteti absolut dhe pasurimi skizofrenik janë “idealet" e tij.

Sipas Metës, kjo është arsyeja që sipas modelit të Ramës, konvergjenca me Bashkimin Europian mund të realizohet me këto ritme 3.5 - 4%, vetëm pas më shumë se ngjysëm shekulli ose kur ai të bëhet 110-vjeç dhe kur t'i afrohet mandatit të 20-të në krye të Qeverisë.

"Nuk i mjaftoi që e bllokoi procesin e integrimit europian për dy vite për shkak të kryetarit të Qarkut Fier. Nuk i mjaftoi që e bllokoi çeljen e negociatave për vite të tëra se donte të bënte zgjedhje lokale pa opozitë, siç i bëri, por edhe shumë zhvillime (bllokime) të tjera (të qëllimshme).

Por ndërsa Shqipëria e firmosi Marrëveshjen e Stabilizim-Asocimit në vitin 2006, pra përpara Malit të Zi dhe Serbisë, këto dy vende i çelën negociatat, Mali i Zi në 2012 dhe Serbia në 2014. Ndërsa Edi Rama mburret se i ka çelur tani, kur dihet që këto dy vende kanë patur probleme madhore nga ish–lufta në Jugosllavi dhe po kështu nuk kanë një përkrahje totale nga shoqëritë e tyre për integrimin europian, krejt ndryshe nga ç'është në vendin tonë, mbështetje mbarëpopullore", shkruan Meta.

POSTIMI:

"Krenaria" e tallavasë të integrimit

Edi Rama ose tallavaja e integrimit është krenar se qenkan çelur negociatat me Bashkimin Europian, kur ishte e pamundur, që ato të shtyheshin më tej. (Nuk do ishte mirë të falenderonim një fatkeqësi si lufta e Rusisë kundër Ukrainës, për çeljen e negociatave tona.)

Nuk i mjaftoi që e bllokoi procesin e integrimit europian për dy vite për shkak të kryetarit të Qarkut Fier. Nuk i mjaftoi që e bllokoi çeljen e negociatave për vite të tëra se donte të bënte zgjedhje lokale pa opozitë, siç i bëri, por edhe shumë zhvillime (bllokime) të tjera (të qëllimshme).

Por ndërsa Shqipëria e firmosi Marrëveshjen e Stabilizim-Asocimit në vitin 2006, pra përpara Malit të Zi dhe Serbisë, këto dy vende i çelën negociatat, Mali i Zi në 2012 dhe Serbia në 2014. Ndërsa Edi Rama mburret se i ka çelur tani, kur dihet që këto dy vende kanë patur probleme madhore nga ish–lufta në Jugosllavi dhe po kështu nuk kanë një përkrahje totale nga shoqëritë e tyre për integrimin europian, krejt ndryshe nga ç'është në vendin tonë, mbështetje mbarëpopullore.

Shqipëria është kaq mbrapa se ka Edi Ramën që dështimin do ta shesë si arritje dhe papërgjegjshmërinë e ka në AND-në e tij, pasi pushteti absolut dhe pasurimi skizofrenik janë “idealet" e tij. Kjo është arsyeja që sipas modelit mediokër, klientelist të Edi Ramës, konvergjenca me Bashkimin Europian mund të realizohet me këto ritme 3.5 - 4%, vetëm pas më shumë se ngjysëm shekulli ose kur ai të bëhet 110-vjeç dhe kur t'i afrohet mandatit të 20-të në krye të Qeverisë.

Nëse ka arsye reale të jemi “krenarë” kjo ka të bëjë me faktin se jemi vendi që edhe fondet e IPARD-it për bujqësinë i çuam te inceneratorët. Po kështu, falë korruptimit që u bënte Edi Rama ambasadorëve, dëgjuam ambasadorë që deklaronin që një vend më mirë të jetë pa Gjykatë Kushtetuese, se me Gjykatë Kushtetuese të korruptuar. Si nuk tha një prej këtyre që më mirë një vend të jetë pa Qeveri, se me Qeverinë më të korruptuar në Europë. Po kështu duhet të jemi “krenarë” se vetëm Edi Rama mund të korruptonte kryeagjentin e FBI, McGonigal dhe shumë krenari të tjera.

Pra ai është fiks siç e thoshte i paharruari Teodor Keko: I dhjerë por krenar. Sidomos për integrimin. Dikur për t'u mbrojtur nga akuzat për korrupsionin e tij të frikshëm, deklaronte se nuk ka hajdut 2 metra. Meqënëse kjo përgjigje antropologjike u rrëzua, tani si argument është se po të ishte korrupsioni kaq i lartë, pse u çelën negociatat? Janë dy arsye kryesore: Së pari, nuk mund të shtyheshin pafund edhe për arsye gjeopolitike. Së dyti, si rruga më e mirë për të kontrolluar sadopak një Qeveri që kishte kapur çdo gjë edhe me korruptimin e zyrtarëve ndërkombëtarë dhe përsëri këtu është meritë edhe e opozitës.

ilir meta