Autoritetet në Afrikën e Jugut vijojnë hetimet për vdekjen e papritur të futbollistit Jayden Adams, mesfushorit të Mamelodi Sund...
POLITIKE
Mbahet Asambleja Kombëtare e Urdhrit të Stomatologut, zgjidhet me shumicë votash Presidenti Almiro Gurakuqi
I.APërditësimi i fundit 16 Prill 2025, 10:38
TIRANË- Mbledhja e Asamblesë Kombëtare të Urdhrit të Stomatologut të Shqipërisë, me pjesëmarrjen e përfaqësuesve nga shtatë rajone të vendit është mbajtur ditën e djeshme në Tiranë. Në përfundim të punimeve, Asambleja zgjodhi Këshillin Kombëtar të institucionit, i cili më pas vijoi me procesin e votimit për drejtuesit e rinj të USSH-së.
Pas shqyrtimit dhe votimit të kandidaturave të paraqitura, Këshilli Kombëtar zgjodhi me shumicë votash Doktorin e Shkencave Mjekësore, Almiro Gurakuqi, në detyrën e Presidentit të Urdhrit të Stomatologut të Shqipërisë. Ndërkohë, Dr. Besmir Okaj u zgjodh në postin e Zv/Presidentit të USSH-së.
Në fjalën e tij përshëndetëse pas zgjedhjes, Gurakuqi falënderoi anëtarët e Asamblesë për besimin dhe theksoi se rrugëtimi drejt kësaj dite ka kaluar përmes një procesi të gjatë dhe kompleks ligjor, i cili ka nisur që në mars të vitit 2016.
Ai theksoi domosdoshmërinë për një institucion transparent, gjithëpërfshirës dhe të bazuar në parimin e barazisë mes profesionistëve, ku çdo anëtar të ketë të drejtën e fjalës dhe të përfaqësimit të barabartë. Gurakuqi nënvizoi se, për një kohë të gjatë, Urdhri i Stomatologut ka funksionuar në mënyrë të gabuar, çka e bëri të domosdoshme një ristrukturim të plotë.
"Fatkeqësisht, me kalimin e kohës, duke mos njohur bazën ligjore, duke mos njohur statutin dhe shpesh të fokusuar vetëm tek profesioni, me dashje apo pa dashje, ata që duhet të vendosnin për fatin e stomatologëve në Shqipëri, filluan të ulnin kokën, herë për konsensus ngrinim dorën në gjysëmshtizë, herë edhe bojkotonin… Për një kohë të gjatë Urdhëri i Stomatologut, vijoi në rrugën e tij të gabuar, rrugë e cila me votën që u dha sot, u konfirmua se nuk kishte qenë rruga e duhur," u shpreh Gurakuqi.
Presidenti i sapozgjedhur theksoi se Urdhri është dhe do të jetë një strukturë që përfaqëson çdo dentist në vend, nga Konispoli deri në Vermosh. Ai u zotua se do të punojë për të garantuar dinjitetin profesional dhe për të adresuar çdo shqetësim në mënyrë të drejtë dhe institucionale.
Ai përmbylli fjalën me zotimin se institucioni që ai do të drejtojë do të jetë një derë e hapur për të gjithë stomatologët, ku çdo shqetësim do të dëgjohet dhe trajtohet në mënyrë institucionale.
