Kongresmenja demokrate amerikane Alexandria Ocasio-Cortez ka reaguar lidhur me protestat në Shqipëri, duke i bërë thirrje qeverisë sh...
POLITIKE
Mblidhet sot Asambleja e Kombëtare e PS-së, Rama zbulon Qeverinë e Re
PiranjatPërditësimi i fundit 11 Shtator 2025, 07:35
Sot, 11 shtator 2025, do të mësohet Qeveria e Re e Shqipërisë.
Partia Socialiste do të mbledhë Asamblenë Kombëtare paraditen e kësaj të enjte, në periferi të Tiranës, ku kryeministri Edi Rama do të publikojë listën e emrave që do të jenë pjesë e ekzekutivit të tij në këtë mandat të katërt qeveritar.
Në përbërje të ekzekutivit të ri pritet që të jenë përfaqësues politikë socialist dhe teknicienë.
Në këtë mbledhje, Rama po ashtu pritet të shpalosë edhe piketat e qeverisjes së 4 viteve të ardhshme dhe sfidat me të cilat do të përballet ajo.
Referuar rendit të ditës, pas fjalës së kryeministrit Rama, do të ketë një hapësirë për diskutime.
Vlen të theksohet se një ditë pas mbledhjes së Asamblesë socialiste, do të zhvillohet seanca e parë e Parlamentit të ri të dalë nga zgjedhjet e 11 Majit.
Presidenti i Republikës Bajram Begaj dekretoi datën 12 Shtator për mbledhjen e legjislaturës së XI-të.
Në këtë seancë 140 deputetët e rinj do të betohen për të ushtruar detyrën e tyre në respekt të Kushtetutës dhe ligjeve të vendit.
Ndërkohë, pas konstituimit të Parlamentit, kryeministri Rama do të duhet që të dorëzojë në zyrën e Presidentit propozimet për ministra.
Presidenti i Republikës ka në dispozicion 7 ditë kohë për dekretimin e ministrave, ndërkohë që më pas brenda 10 ditësh dekretet e kreut të shtetit kalojnë për votim në seancë plenare.
Po në këtë seancë, kryeministri paraqet edhe programin politik të qeverisë së tij.
