Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
POLITIKE
Mediat ndërkombëtare jehonë arrestimit të Metës: Ish-presidenti i Shqipërisë në pranga për pastrim parash, korrupsion dhe mosdeklarim pasurish
M.B.Përditësimi i fundit 21 Tetor 2024, 16:04
TIRANA- Mediat e huaja i kanë bërë jehonë lajmit të arrestimit të kreut të Partisë së Lirisë, Ilir Meta. Presigjozja “The Washington Post” shkruan se ish-presidenti dyshohet për pastrim parash.
“Ish-presidenti i Shqipërisë Meta është arrestuar, dyshohet për pastrim parash”, shkruan “The Washington Post”.
"Abc News" shkruan se Meta, 55-vjeç, u arrestua në kryeqytet, nga oficerët e Byrosë Kombëtare të Hetimit.
"Stacionet televizive lokale treguan oficerë policie të maskuar dhe me rroba civile duke marrë Metën nga automjeti i tij pasi ai u kthye nga Kosova fqinje përpara mbajtjes së një konference për shtyp", shkruan "Abc News".
Ndërkohe "Assosiated Press" ka shkruar se Partia e majtë e Shqipërisë së Lirisë tha të hënën se lideri i saj dhe ish-presidenti shqiptar Ilir Meta është arrestuar me akuza të dyshuara për pastrim parash.
"Meta u arrestua në kryeqytet, Tiranë, nga oficerët e Byrosë Kombëtare të Hetimit, sipas mediave lokale. Sekretari i Përgjithshëm i partisë, Tedi Blushi, e quajti atë “një rrëmbim kriminal”. Nuk ka pasur asnjë koment të menjëhershëm nga prokuroria”, shkruan "Assosiated Press".
Nga ana tjetër "Balkan Insight" shkruan se Ilir Meta, presidenti i Shqipërisë nga viti 2017 deri në vitin 2022 dhe tani kryetar i Partisë së Lirisë në opozitë, u arrestua të hënën me urdhër të prokurorëve të Strukturës së Posaçme Kundër Korrupsionit, SPAK.
"Hetimet për Metën kanë nisur vitin e kaluar. Ai u mor në pyetje në qershor nga SPAK. Kreu i Partisë Demokratike të opozitës, Sali Berisha, dënoi arrestimin, duke thënë: “Gjithçka që po bëhet kundër tij është politike”. Meta u votua si president i Shqipërisë në vitin 2017 me mbështetjen e Partisë Socialiste në pushtet të Edi Ramës. Partia që Meta drejtonte në atë kohë, LSI, kishte hyrë në koalicion me socialistët pas zgjedhjeve të vitit 2013. Meta mori drejtimin e partisë në vitin 2022 pas përfundimit të mandatit të tij si president", shkruan "Balkan Insight".
Edhe në mediat italiane arrestimi i Metës ka marrë vëmendje teksa "La Repubblica" shkruan se në Shqipëri është arrestuar ish-presidenti i vendit.
"Ai është arrestuar me urdhër të Strukturës së Posaçme Kundër Korrupsionit në kuadër të një hetimi që po vazhdon për pasurinë e tij. Meta ka qenë objekt i disa hetimeve nga autoriteti, më i fundit në lidhje me çështjet e tij financiare, duke përfshirë aktivitetin lobues të kryer në Shtetet e Bashkuara", shkruan "La Repubblica".
Lajmi ka marrë vëmendje edhe në mediat greke ku "Protothema" shkruan se arestimi i Metës vjen me urdhër të SPAK-ut (organi kompetent antikorrupsion), ndërsa ai akuzohet për korrupsion.
"Meta është shprehur se nuk është përfshirë asnjëherë në çështjet pronësore apo financiare për të cilat është akuzuar. Ilir Meta kishte paralajmëruar një konferencë për shtyp në orën 13:40, me sa duket duke ditur arrestimin e tij të afërt, por policia e arrestoi para se të fillonte intervista", shkruan "Protothema".
