Mesazhet shantazhuese/ Gazment Bardhi del nga SPAK: Kam dorëzuar telefonin për verifikimet e nevojshme, ja ku i kam dyshimet

gazment bardhi

TIRANË- Kreu i Grupit Parlamentar të PD-së, Gazment Bardhi ka dalë nga ambientet e Prokurorisë së Posaçme. Bardhi u paraqit në SPAK për të dhënë detaje pas kallëzimit që bëri se e kanë kërcënuar me anë të mesazheve në aplikacionin "Signal". 

Ai u shpreh se nuk ka asnjë përgjim real dhe se të gjitha sipas tij janë prodhuar me qëllimin "kriminal" për të shantazhuar një deputet. 

I pyetur nëse dyshon te dikush apo nëse mesazhet kanë ardhur pas përgjimeve të Sky ECC që ai lexoi në Kuvend, demokrati tha se dyshimet e tij janë se personat pas këtyre mesazheve janë ose subjekte të krimit ose personat publik që dalin nga përgjimet e Sky ECC. Ai tha se kishte lënë celularin e tij tek prokurorët për verifikimet e nevojshme.

"Nuk bëhet fjalë për asnjë përgjim real, janë prodhuar më qëllim kriminal për të shantazhuar një deputet. Në dijeninë time ka ndodhur edhe me persona të tjerë dhe menjëherë dhe sapo jam njohur me to, kam vënë në dijeni SPAK. Është e konfirmuar se ai format nuk ekziston në përgjimet zyrtare të Sky Ecc që ka Prokuroria e Posaçme. Jam duke mbledhur edhe të dhëna për mediat që i japin si të vërteta, se pe po bëhen pjesë e skemës shatazhuese ndaj një deputeti. Së dyti, SPAK ka marrë të gjitha të dhënat për itë identifikuar nga ka ardhur mesazhi në telefonin tim. Nuk kam asnjë dyshim. Nuk është vetëm në interesin tim personal. Unë nuk shantazhohem për mbrojtje të interesit publik. Askush nuk mund të guxojë të fabrikojë të dhëna të rreme. Dyshimi është që persona që kanë sajuar këtë veprim kriminal janë ose subjekte të krimit të organizuar, ose persona publik, zyrtarë të artë që dalin realisht në përgjimet e Sky Ecc. Nuk më mori njëri në pyetje. I vura në dispozicion prokurorëve telefonin tim.", tha Bardhi

Kreu i grupit demokrat është kërcënuar nga mesazhe anonime në aplikacionin 'Signal'. Në mesazhe, shkruheshin emrat e Ervis Martinajt dhe të Erigers Mihasit, me shkrimin 'Të jesh mirë'. Bardhi i ka kërkuar SPAK-ut që të hetojë dhe verifikojë në një kohë të shpejtë mesazhet me natyrë intimiduese ndaj një deputeti të Kuvendit të Shqipërisë, me qëllim identifikimin e autorit/ëve të këtyre mesazheve, motiveve të dërgimit të tyre, dhe arsyet e prodhimit të një dokumenti të falsifikuar.

gazment bardhi