Një tjetër grup studentësh, ata të Mjekësisë, i janë bashkuar turmës së protestuesve të mbledhur para Kryemini...
POLITIKE
Mësuesit shqiptarë “të shkëlqyer” sipas OECD, por më të keqpaguarit nga qeveria
PiranjatPërditësimi i fundit 10 Tetor 2025, 15:45
Shqipëria është renditur ndër vendet me performancën më të mirë në raportin e fundit të Organizatës për Bashkëpunim dhe Zhvillim Ekonomik (OECD) mbi Anketën Ndërkombëtare të Mësimdhënies dhe të Nxënit (TALIS), ku u vlerësua për përkushtimin dhe motivimin e mësuesve, si dhe për përdorimin e teknologjisë në shkolla.
Në prezantimin zyrtar të raportit, Kryeministri Edi Rama u shfaq entuziast për këtë rezultat, duke e cilësuar si një “lajm shumë të mirë” dhe një “sukses të përbashkët” mes mësuesve, prindërve dhe institucioneve. Ai theksoi se rezultatet e larta në këtë anketë janë meritë e mësuesve shqiptarë dhe reflektim i përpjekjeve të përbashkëta për përmirësimin e sistemit arsimor.
Por pavarësisht këtij vlerësimi të lartë ndërkombëtar, Kryeministri nuk bëri asnjë premtim për rritje page për mësuesit, të cilët prej vitesh kërkojnë vlerësim më konkret dhe përmirësim të kushteve të punës.
“Erdha sot këtu me një kënaqësi të veçantë, sepse është një lajm shumë i mirë për prindërit në radhë të parë… Mësuesit tanë kanë dalë mirë,” u shpreh Rama, duke theksuar se Shqipëria është renditur përkrah vendeve me sisteme arsimore të zhvilluara. “Nuk kemi pse të ndjehemi në vështirësi për të qenë krenarë për të gjithë mësuesit e Shqipërisë,” shtoi ai.
Raporti i OECD evidenton gjithashtu nivele të larta të përdorimit të teknologjisë në shkolla, si dhe një partneritet pozitiv mes mësuesve, prindërve dhe nxënësve, që sipas Ramës, është një tregues i veçantë krahasuar me shumë vende të tjera pjesëmarrëse në anketim.
Mosadresimi i çështjes së rritjes së pagave bie në kontrast të fortë me vlerësimet pozitive që vetë qeveria pranon.
Rezultatet e larta në TALIS tregojnë përkushtim të madh nga mësuesit shqiptarë, por pa masa konkrete si rritje pagash, kushte më të mira pune dhe mbështetje të vazhdueshme.
