Teksa vendi ynë prej 53 ditësh po përballet me protesta masive, ku kërkohet dorëheqja e kryeministrit Edi Rama, mesazhi i arkitekti i...
POLITIKE
Mundësia e një rezolute kundër Gjykatës Speciale, Rama: Kosova nuk e ka një vullnet të tillë
PiranjatPërditësimi i fundit 28 Shtator 2025, 08:58
Kryeministri Edi Rama, ka komentuar për herë të parë mungesën e vullnetit në Kosovë për të miratuar një rezolutë të përbashkët në Kuvendin e Kosovës që do të kundërshtonte Gjykatën Speciale. Në një intervistë televizive, Rama tha se ka shumë elemente të farsës në procesin e Gjykatës Speciale.
Sipas tij, aktualisht nuk ka një konsensus të mjaftueshëm mes forcave politike në Kosovë për të formuluar një qëndrim të përbashkët, i cili do t’i kundërvihej asaj që ai e konsideron si një "farsë". Ai theksoi se, edhe pse Shqipëria do t’i bashkohej menjëherë një rezolute të tillë, aktualisht situata në Kosovë nuk ofron mundësinë për një veprim të tillë.
Rama shtoi se historiku i Gjykatës Speciale do të lë pasojat e veta, duke vënë në dukje se vendet që e kanë mbështetur krijimin e saj, do të ndihen të detyruara të reformojnë këtë sistem në të ardhmen. Ai paralajmëroi se në një moment të caktuar, ata do të "zgjohen" dhe do të kërkojnë ndryshime të thella në mekanizmat që kanë ndihmuar në ngritjen e kësaj gjykate.
“Nuk ka vullnet në Kosovë për të dalë me një rezolutë të Parlamentit të Kosovës, një rezolutë përtej partive politike të cilës ne do t’i bashkoheshim menjëherë ndaj Gjykatës Speciale dhe ndaj gjithë kësaj farse sepse ka shumë farsë në këtë mes.
Pa shkuar në parashikime ogurzeza, e gjithë kjo histori është një histori shumë e trishtueshme dhe zhgënjyese që unë kam përshtypjen që do të lë gjurmë tek vendet që e sponsorizojnë këtë gjykatë dhe kam përshtypjen që në një moment të caktuar do të zgjohen për ta reformuar këtë lloj sistemi kaq zhgënjyes. Por, fatkeqësisht, në momentin që flasim, nuk kemi çfarë të bëjmë tjetër përveç se të ndjekim procesin duke shpresuar që në fund do të ketë një dritë ndërgjegjeje në momentin e marrjes së vendimit dhe nuk do të jetë deri në fund një tunel pa dritë si ky që ka qenë deri tani", tha kryeministri Rama.
