Një tjetër grup studentësh, ata të Mjekësisë, i janë bashkuar turmës së protestuesve të mbledhur para Kryemini...
POLITIKE
"Ndalimi i pari i këtij lloji në Evropë", The Telegraph: Shqipëria ndalon TikTok pas sherrit të adoleshentëve që përfundoi me therje fatale!
n.fPërditësimi i fundit 22 Dhjetor 2024, 22:59
Rama
TIRANË- Mbyllja e platformës TikTok në Shqipëri ka tërhequr vëmendjen e mediave ndërkombëtare. Në një artikull të publikuar nga "The Telegraph" shkruan se Shqipëria do të ndalojë TikTok për një vit pasi vrasja e një adoleshenti ngriti frikën se aplikacioni i mediave sociale është një ndikim negativ. Më tej në artikull shkruhet se Edi Rama, kryeministri i vendit, konfirmoi të enjten se aplikacioni për ndarjen e videove do të ndalohet nga janari si pjesë e një plani për t'i bërë shkollat më të sigurta.
“Për një vit, ne do ta mbyllim plotësisht atë për të gjithë. Nuk do të ketë TikTok në Shqipëri”, tha Rama pas takimit me grupet e prindërve dhe mësuesit.
Ndalimi, i pari i këtij lloji në Evropë, u nxit nga vdekja e një nxënësi 14-vjeçar të therur me thikë nga një nxënës tjetër në mes të nëntorit. Dy adoleshentët mendohet se janë përleshur në fund të ditës së shkollës pas një debati në rrjetet sociale.
14-vjeçari u godit me thikë në zemër dhe vdiq një orë më vonë në spital, sipas raportimeve të mediave. Ngjarja u festua në internet nga disa përdorues të TikTok. Hetimet për vrasjen janë duke vazhduar. Nuk është ende e qartë nëse argumenti filloi në TikTok por Rama ka argumentuar se fajin e ka platforma e mediave sociale me bazë në Kinë, duke e etiketuar atë "banditi i lagjes".
“Problemi sot nuk janë fëmijët tanë, problemi sot jemi ne, problemi sot është shoqëria jonë, problemi sot është TikTok dhe gjithë të tjerët që po i marrin fëmijët tanë peng”, tha Rama.
TikTok tha se po kërkonte “qartësi urgjente” nga qeveria shqiptare pasi gjeti asnjë provë që autori apo viktima ishte regjistruar në aplikacion.
“Raporte të shumta në fakt kanë konfirmuar se videot që çuan në këtë incident po postoheshin në një platformë tjetër, jo në TikTok,” tha një zëdhënës i kompanisë.
Ina Zhupa, nga Partia Demokratike e opozitës shqiptare, tha se vendimi diktatorial për mbylljen e platformës së mediave sociale TikTok është një akt i rëndë kundër lirisë së fjalës dhe demokracisë.
“Është një akt i pastër elektoral dhe abuzim me pushtetin për të shtypur liritë”.
TikTok tashmë është i ndaluar në disa vende anembanë botës, përfshirë Indinë- ku u shpall i jashtëligjshëm në vitin 2020- Irani, Nepali, Afganistani dhe Somali. Australia kohët e fundit miratoi ligjin më të rreptë në botë për mediat sociale , që ndalon fëmijët nën 16 vjeç të përdorin çdo platformë të tillë, ndërsa në Francë fëmijët nuk lejohen të përdorin rrjetet sociale deri në moshën 15 vjeç, përveç nëse kanë lejen e prindërve.
SHBA po lëviz për të ndaluar TikTok nëse nuk shitet nga ByteDance , kompania e saj mëmë kineze, deri më 19 janar. Kongresi ka thënë se aplikacioni është i lidhur me shtetin kinez , diçka që TikTok dhe ByteDance e mohojnë të dy.
