Nga pritja e liderëve në tapetin e kuq te fotoja familjare, Rama ndan pamje nga samiti i KPE: Ditë historike e Europës në Shqipëri

rama, macron

TIRANË- Kryeministri Edi Rama ka ndarë sot pamje nga samiti i Komunitetit Politik Evropian që u zhvillua ditën e djeshme në Tiranë. Në videon e postuar shihen momente nga pritja e liderëve në tapetin e kuq, bërja e fotos familjare, nënshkrimet e pjesëmarrësve në yllin europian, diskutimet në samit dhe vizita e presidentit Emmanuel Macron te Piramida e Tiranës. 

"MIRËMËNGJES dhe me krenarinë e një dite historike të Europës në Shqipëri, ju uroj një ditë të mbarë", shkruan Rama në postimin e tij.

Samiti u bashkëdrejtua nga kryeministri Edi Rama dhe presidenti i Këshillit Evropian, Antonio Costa. Rama ishte ai që drejtoi fjalën në tryezën e parë të diskutimeve. Ndërkohë pas tij mbajti fjalën presidenti i KE, Antonio Costa, presidenti francez Emmanuel Macron,presidenti ukrainas, Volodymyr Zelensky, kryeministri britanik Keir Starmer, kryeministrja italiane Giorgia Meloni, presidenti turk Rexhep Tayip Erdogan, kancelari gjerman Friedrich Merz, presidentja e Komisionit Europian Ursula Von der Leyen.

Gjatë fjalës së tyre u theksua mbështetja ndaj Ukrainës dhe nevoja për arritjen e një armëpushimi dhe paqeje të qëndrueshme. Nën moton "Evropa e Re në një botë të re: unitet, bashkëpunim, veprim i përbashkët”, ky forum politik synonte të thellonte bashkëpunimin ndërmjet vendeve të Bashkimit Evropian dhe atyre jashtë tij, si një platformë e hapur për dialog. Diskutimet e samitit u zhvilluan rreth tri tryezave tematike, të cilat reflektonin orientimin strategjik të Evropës përballë krizave aktuale dhe të ardhshme. 

edi rama samiti i kpe ne tirane