Nga Samiti Europian, Forumin Ndërkombëtar Ekonomik dhe inaugurimi i shkollave, Macron rikthehet në Shqipëri, nesër vizitë zyrtare, shoqërohet nga bashkëshortja

TIRANA- Samitin e gjashtë të Komunitetit Politik Evropian mbahet sot në Tiranë në Sheshin "Skënderbej", ku do të marrin pjesë liderët e rreth 50 vendeve evropiane, së bashku me drejtuesit e institucioneve më të larta ndërkombëtare. Në mesin e liderëve që do të zbresë në Tiranë për të marrë pjesë në Samitin e Komunitetit Politik Evropian është edhe presidenti francez Emmanuel Macron.

Presidenti francez do të largohet i fundit, pasi më 17 maj, do të zhvillojë edhe një vizitë zyrtare në vendin tonë. Kjo është vizita e dytë zyrtare brenda një viti e gjysmë e presidentit francez në Tiranë. Më 16 tetor 2023, ai u prit nga kryeministri Rama dhe presidenti Begaj ndërsa dekoroi shkrimtarin e ndjerë Ismail Kadare me nderimin më të madh që Parisi i kulturës jep: “Oficerit të Madh të Legjionit të Nderit”.

Bëhet me dije se Presidenti francez do të shoqërohet edhe nga bashkëshortja e tij, Brigitte Macron. Të dy do të marrin pjesë në forumin ndërkombëtar ekonomik “Iniciativa e Investimeve të së Ardhmes”, ku Macron dhe Rama do të mbajnë fjalët hapëse. Gjatë vizitës së tij, presidenti francez dhe zonja e parë do të inaugurojnë shkollën teknologjike “Ecole 42” në Tiranë dhe një tjetër shkollë të teknologjisë së informacionit në qytetin e Korçës.