Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
POLITIKE
"Një njeri që dha gjithmonë drejtësi"/ Ish-deputeti demokrat: Vrasja e Astrit Kalasë, një akt i papranueshëm
PiranjatPërditësimi i fundit 7 Tetor 2025, 15:25
Ish-deputeti i Partisë Demokratike, Asllan Dogjani, ka bërë përgjegjëse strukturat shtetërore për vrasjen e gjyqtarit Astrit Kalaja, i cili u ekzekutua më 6 tetor në Gjykatën e Apelit në Tiranë, teksa po jepte një vendim. Gjatë një intervistë televizive, Dogjani ka theksuar se ngjarja e rëndë është një pasojë e dështimit të sistemit të drejtësisë dhe masave të sigurisë në institucionet gjyqësore.
Dogjani u shpreh se sulmet e Kryeministrit Edi Rama ndaj drejtësisë kontribuojnë në krijimin e një ambienti të pasigurt për punonjësit e sistemit. Ai tha se kur Kryeministri deklaron se disa gjykatës janë të padrejtë, kjo ndikim negativisht në besimin e qytetarëve dhe në rritjen e tensioneve sociale.
“Gjyqtari është shteti,” – theksoi Dogjani, duke u referuar vrasjes së Kalajës. Sipas tij, masat e sigurisë në gjykata janë të pamjaftueshme dhe se Policia e Shkodrës ka dështuar në parandalimin e konflikteve të vazhdueshme që kanë eskaluar deri në dhunë. Dogjani theksoi se ngjarja ndodhi në një moment ku familja Shkambi, që ka pasur konflikte me shtetin, ishte përfshirë në një proces gjyqësor të ndërlikuar për pronat.
“Bëhet fjalë për një konflikt midis 30 familjeve, të cilat u futën në një pallat me marrëveshje me shtetin. Ai që pretendon se është pronar, guxon të hyjë në sallë me armë dhe të vrasë gjyqtarin. Ky është një akt i papranueshëm,” – tha Dogjani. Ai gjithashtu bëri thirrje për një analizë të thelluar të veprimeve të policisë dhe të gjithë zinxhirit të ngjarjeve që çuan në tragjedinë.
Dogjani akuzoi Policinë e Shkodrës për mosmarrjen e masave të nevojshme për të parandaluar ngjarjen dhe e konsideroi këtë një dështim të shtetit. “Astrit Kalaja e vrau shteti,” – shtoi Dogjani, duke theksuar se vrasja e gjyqtarit është pasojë e dështimeve të institucioneve shtetërore që nuk arritën të siguronin një mjedis të sigurt për drejtësinë.
Në fund, Dogjani shprehu ngushëllimet për familjen e gjyqtarit Astrit Kalaja, me të cilin ka pasur një njohje dhe bashkëpunim gjatë periudhës kur ai ka punuar si drejtor i Policisë së Shkodrës. Dogjani e cilësoi Kalajën si një njeri që ka dhënë gjithmonë drejtësi dhe se kjo vrasje është një goditje për sistemin e drejtësisë shqiptare.
