Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
POLITIKE
Ola Xama: Ndryshimi i aksionerit në kontratat konçensionare, do duhet të marrë miratim nga Autoriteti Kontraktor dhe Ministria e Financave
PiranjatPërditësimi i fundit 21 Tetor 2025, 08:14
Gazetarja Ola Xama përmes një statusi ka nxjerrë një vendim të fundit të firmosur nga zëvëndëskryeministrja Belinda Balluku, i cili detyron që çdo ndryshim aksioneri në kontratat konçensionare do të duhet më parë të marrë autorizimin nga Autoriteti Kontraktor dhe Ministria e Financave.
Nga Ola Xama
Ligji për Koncesionet dhe Partneritetin Publik Privat detyron që përpara ndryshimit të çdo aksioneri në kontratat koncesionare, duhet marrë fillimisht miratimi i Autoritetit Kontraktor dhe Ministrisë së Financave.
Përse është vendosur ky kusht?
Kjo është një garanci që kompania koncesionare e cila ngrihet me qëllim të dedikuar të kontratës koncesionare (SPV), të mos dalë jashtë termave të referencës së tenderit dhe detyrimeve zbatuese që rrjedhin prej tyre, të cilat reflektohen më pas në kontratën koncesionare.
Kriteret kryesore për të fituar një kontratë koncesionare, siç është rasti i Aeroportit të Vlorës, janë aftësia teknike e financiare për të ndërtuar dhe operuar një aeroport.
Bashkimi i operatorëve në këtë rast duhet të depozitojë garanci të burimit të financimit dhe përvojë në punë të ngjashme. Këtë kriter të fundit e plotësonte kompania turke "YDA INSAAT SANAYI VE TICARET”.
Shitja e 40% të aksioneve që kjo firmë kishte në kontratën koncesionare në dhjetor të vitit 2022, është miratuar nga titullari i Autoritetit Kontraktor, ministrja e Infrastrukturës dhe Energjisë dhe ministrja e Financave!
Në shkresë miratohet kalimi i kuotave nga turqit -te kompania “MABCO”. Pra, jo për firmën “2A Group”!
Çfarë do të thotë kjo?
Nëse ka një kontratë mes “MABCO” dhe “2A Group” që nuk është depozituar në Qendrën Kombëtare të Biznesit, do të duhej të ishte marrë më parë miratimi i këtyre dy ministrive. Nëse aksionerët e “2A Group” kanë investuar (siç pretendojnë) miliona euro, kush ia ka dhënë sigurinë se kalimi i aksioneve do të miratohej? Dhe nëse ka patur një marrëveshje të tillë asnjë nga palët nuk është pa faj. As MABCO, as YDA, as 2A Group dhe as ministritë!
Por përtej përplasjeve tregtare që mund të kenë bizneset, ajo që ne duhet të kërkojmë është përgjegjësia që institucionet publike kanë kur pranojnë përfshirjen në kontrata koncesionare të kompanive pa përvojë teknike dhe në shkelje të plotë të termave që është bërë tenderi. Atëherë përse duhet bërë një procedurë me garë dhe përse duhen vendosur kritere kualifikimi?
Ky është problemi kryesor i aferave korruptive në kontratat koncesionare: ose hyjnë kompani offshore me pronarë anonimë, ose i ndryshon pronësia pas miratimit të kontratës dhe pas firmave të reja fshihen kompani të lidhura me zyrtarë të lartë.Nëse duhet të ndalen këto afera, ky është momenti ku duhet të veprojë drejtësia, përndryshe është shumë vonë.
P.S. Sa për paratë ruse që flitet se mund të jetë financuar kompania “MABCO”, akuzat edhe mund të jenë të vërteta, por modestisht nuk besoj se këto lidhje dhe gjurmët e transaksioneve do t’i gjejë Prokuroria e Tiranës…!
