Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
POLITIKE
PD propozon që të shpallet 'Dëshmor i Atdheut', PS '1 minutë heshtje'/ Çfarë pritet të ndodhë nesër në Kuvend
PiranjatPërditësimi i fundit 8 Tetor 2025, 14:00
Pas ngjarjes tronditëse të vrasjes së gjyqtarit të Apelit, Astrit Kalaja, në sallën e gjyqit më 6 tetor, Kuvendi i Shqipërisë pritet të mbajë një minutë heshtje në nderim të tij gjatë seancës parlamentare të ditës së nesërme, 9 tetor 2025. Propozimi u bë nga Taulant Balla, kryetar i grupit parlamentar të Partisë Socialiste, gjatë mbledhjes së Konferencës së Kryetarëve.
Megjithatë, opozita ka kërkuar që reagimi i Kuvendit të mos kufizohet vetëm në një gjest simbolik, por të pasohet me veprime konkrete dhe të menjëhershme.
Partia Demokratike ka propozuar që gjyqtari Kalaja të shpallet "Dëshmor i Atdheut", duke i kërkuar institucioneve përkatëse që të nisin pa vonesë procedurat zyrtare për dhënien e këtij titulli.
Ndërsa kreu i grupit parlamentar të Partisë së Lirisë, Tedi Blushi, e cilësoi ngjarjen si një “akt terrorist” dhe një alarm kombëtar për sigurinë publike në vend. Ai kërkoi që Kuvendi të mos kufizohet në formalitete, por të zhvillojë një debat të posaçëm parlamentar mbi sigurinë në institucionet e drejtësisë.
“Kuvendi nuk mund të mblidhet vetëm për të miratuar procesverbale. Akti terrorist i ekzekutimit të gjyqtarit Astrit Kalaja është alarm kombëtar për sigurinë e jetës. Krimi ka marrë yrysh, shqiptarët janë më të pasigurt se kurrë,” deklaroi Blushi.
