Procesi i numërimit të votave të diasporës drejt përfundimit, 14 mijë fletë ende pa u hapur

TIRANË- Procesi i numërimit të votave nga diaspora për zgjedhjet e mbajtura më 11 maj po vijon pa ndërprerje ndërsa për qarkun e Lezhës dhe të Fierit ka përfunduar ky proces. Aktualisht, kanë mbetur rreth 14 mijë vota të panumëruara nga jashtë vendit. Sipas Komisionit Qendror të Zgjedhjeve, aktualisht po numërohen votat e diasporës për kandidatët në qarqet Tiranë, Durrës, Shkodër dhe Kukës.

Edhe pas rezultateve të diasporës PD në Lezhë ka katër mandate ndërsa PS ka 3 mandate. Pas përfundimit të numërimit demokratët të cilët kanë ndjekur të gjithë procesin e numërimit në Parkun Olimpik duartrokitën rezultatin. Vota e diasporës nuk mjaftoi për të përmbysur avantazhin e PD-së brenda territorit, ndonëse rezultati final u nda vetëm për disa dhjetëra zarfe, 70 vota. 

Deputetet e Lezhës në Kuvend

Agron Gjekmarkaj: Lista e Mbyllur (PD) 
Elda Hoti: Lista e Mbyllur (PD) 
Gjin Gjoni: 8873 vota - Lista e Hapur (PD) 
Kastriot Piroli: 5632 vota - Lista e Hapur (PD) 
Ulsi Manja: Lista e Mbyllur (PS)
Ermal Pacaj: Lista e Mbyllur (PS) 
Marjeta Neli: 6745 Lista e Hapur (PS)

Partia Socialiste edhe pas numërimit të votave të diasporës për qarkun e Fierit ka ruajtur mandatin e 12-të. Nga qarku i Fierit, PS fut në Kuvend 5 deputetë nga lista e mbyllur, Belinda Balluku, Petrit Malaj, Kiduina Zaka, Erjo Mile dhe Ana Nako.

Nga lista e hapur futen 7 deputetë. Në Kuvend futen Ceno Klosi, Klevis Jahaj, Asfloral Haxhiu, Antoneta Dhima, Elton Korreshi, Zegjine Çaushi dhe Dhimitër Kruti. PD-ASHM në këtë qark merr 4 deputetë nga lista e mbyllur: Gazment Bardhi, Luan Baçi, Brunilda Haxhiu dhe Saimir Korreshin.