Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
POLITIKE
Projektiligji për Forcën Rezerviste/ Ministri Vengu: Synohen 2100 rezervistë deri në 2030-ën! Ja sa do jetë kostoja mujore
ZH.LLPërditësimi i fundit 2 Dhjetor 2024, 18:39
Pirro Vengu
TIRANË- Në Komisionin e Ekonomisë u miratua projektligji për organizimin dhe funksionimin e Forcës Rezerviste në Republikën e Shqipërisë, ku ministri i Mbrojtjes Pirro Vengu ka prezantuar disa nga aspektet kryesore.
Ministri Vengu tha se përmes këtij projektligji synohet rritje për forcat e armatosura, teksa foli me shifra duke zbuluar se aktualisht në vendin tonë janë vetëm 6500 prej tyre të mobilizueshme.
“Maksimali për forcat e armatosura duhet të jetë 12 mijë të rekrutuar dhe nga këto 10 mijë duhet të jenë të mobilizueshme, aktualisht ne kemi vetëm 6500 prej tyre të mobilizueshme, dhe përmes këtij projektligji synojmë të rrisim këtë forcë”, tha Vengu.
Gjatë fjalës së tij, Vengu ka shtuar se po synojnë të kapin një standart ku në vitin 2030 të ketë 2100 rezervistë.
"Në vitin 2030 synojmë të kemi 2100 forca rezerviste në total. Synojmë të kapim standardin ku forcat rezerviste të përbëjnë 20% të forcave aktive", theksoi ministri.
Sa i përket kostos, ministri tha se për të arritur objektivin e 2030-ës, për çdo vit do të ketë shtesa.
“Kosto fillestare për vitin 2025 parashikohet për aktivizimin e një kompanie me 125 vetë dhe është e vlerësuar të arrijë në masën 155.7 milionë lekë që është e reflektuar në plan-buxhetin 2025, dhe për çdo vit kemi shtesa për të arritur në objektivin e 2030-ës me katër kompani me nga 475 veta secila”, tha Pirro Vëngu, ministër i Mbrojtjes.
Në lidhje me pagesën e rezervistëve, teksa iu përgjigj pakënaqësisë së deputetëve, Vengu tha se rezirvisti paguhet vetëm për ditën në shërbim dhe se paga përfshin gjithçka, nga pajisjet personale deri te karburanti.
“I bie 10 mijë euro në vit për person. Edhe çik më shumë. 1 mijë në muaj për një rezervist që do shërbejë për maksimalisht 40 ditë”, tha deputeti Dashamir Shehi.
“Po, kosto është rreth 1000 euro pasi përshihen nga uniforma te pajisjet personale, bashkë me rrogën dhe pagesat e ushqimit dhe karburantit. Do ti paguajmë rezervistët për sa kohë do të jenë të angazhuar, dhe jo për gjithë vitin. Pra aq sa ditë do angazhohen do paguhen.”, tha Vëngu.
Vengu theksoi se kohëzgjatja e shërbimit si rezervist zgjat 14-45 ditë në vit, por afati mund të jetë më i gjatë nëse kërkohen shërbime specifike. Ndërsa duke u ndalur te mosha maksimale për t’u përfshirë në forcën rezerviste ministri ka zbuluar se maksimumi është 60 vjeç.
“Kohëzgjatja e shërbimit rezervistë do të jetë nga 14-45 ditë në vit, afati mund të jetë më i gjatë nëse do të kërkohen shërbime specifike, apo nëse do të shkojnë në misione", tha Vengu.
“Për t’u përfshirë në forcën rezerviste, të gjithë shtetasit që nuk janë të dënuar me burg, me vendim të formës së prerë, dhe nuk kanë mbushur moshën 50 vjeç për ushtar të thjeshtë, 55 vjeç për nënoficer dhe 60 vjeç mosha maksimale për oficer”, ka theksuar ministri.
