Aktorja shqiptare Anila Disha po padit qeverinë për përdorimin e fytyrës dhe zërit të saj, pas krijimit të ministres së inteligjencës artificiale, një anëtari virtual të kabinetit. Kur Edi Rama filloi mandatin e tij të katërt si kryeministër i Shqipërisë shtatorin e kaluar, ai emëroi Diellën, që do të thotë “diell” në shqip, një ministre virtuale të krijuar nga inteligjenca artificiale për të mbikëqyrur dhënien e kontratave qeveritare si një hap drejt luftës kundër korrupsionit.
“Diella është anëtarja e parë e kabinetit që nuk është fizikisht e pranishme, por është në thelb një produkt i inteligjencës artificiale”, tha Rama në atë kohë. Ajo do të ndihmojë që Shqipëria të bëhet një vend ku tenderët publikë janë 100% të lirë nga korrupsioni.
Diella fillimisht u lançua në fillim të këtij viti si një asistente virtuale TN në platformën e-Albania , duke ndihmuar qytetarët dhe bizneset të merrnin dokumente qeveritare. E veshur me veshje tradicionale shqiptare, ajo ofroi ndihmë nëpërmjet komandave zanore dhe lëshoi dokumente me vula elektronike, duke zvogëluar vonesat burokratike. Diella ka tiparet e fytyrës dhe zërin e Anila Bishës, një aktore filmi dhe teatri e cila thotë se nuk ka dhënë kurrë pëlqimin e saj që tiparet e saj të përdoren në këtë mënyrë, gjë që ka rezultuar në ngacmimin e saj në internet dhe vëmendjen e padëshiruar në rrugë.
"Në fillim u habita, buzëqesha dhe thashë se duhet të jetë qesharake", tha Bisha për Reuters. "Tani njerëzit më quajnë Diella dhe mendojnë se jam thjesht një tjetër ministre e qeverisë", tha ajo.
Ajo thotë se lejoi që karakteristikat e saj të përdoren vitin e kaluar si asistente virtuale e TN në platformën e- Albania, por jo si ministre virtuale në kabinetin e Ramës. "Ata që nuk e pëlqejnë kryeministrin tani më urrejnë", tha Bisha.
Qeveria mohon përdorimin e karakteristikave të saj në mënyrë të papërshtatshme.
"Padia është e pakuptimtë, por ne e mirëpresim mundësinë për ta zgjidhur çështjen njëherë e përgjithmonë në gjykatë", tha zyra e shtypit e qeverisë në përgjigje të pyetjeve nga Reuters.
Imazhi publik i qeverisë shqiptare është dëmtuar që nga dhjetori, kur SPAK paditi zëvendëskryeministren Belinda Baluku me akuzat për ndërhyrje në tenderat e infrastrukturës, akuza që ajo i mohon. Fotografia e Diellës shfaqet në rreshtin e parë të emrave të kabinetit në faqen e internetit të qeverisë, pranë fotove të Ramës dhe Balukut.
Një gjykatë pritet të vendosë të hënën nëse do ta urdhërojë qeverinë të ndalojë përdorimin e fotos së Bishës. Avokati i saj, Aranit Rossi, tha se Bisha po kërkon 1 milion euro dëmshpërblim.
"Ligji përcakton se në rastet e shkeljeve të të dhënave personale, sanksionet për institucionet shtetërore mund të arrijnë deri në 21 milion euro, kështu që kërkesa jonë për 1 milion është një shumë e arsyeshme", tha ai./Piranjat.news
