PS hap zyrtarisht fushatën elektorale, ja sa deputetë merr PS-ja sipas drejtuesve politikë të qarqeve

TIRANA- Partia Socialiste ka hapur zyrtarisht fushatën elektorale për zgjedhjet e 11 majit ditën e sotme. Drejtuesit politikë të qarqeve kanë mbajtur fjalën secili pas koreografive që kishin organizuar për prezantimet e ekipeve përkatëse. Pjesa me e madhe e 12 drejtuesve politikë të qarqeve për PS-në, nuk i kursyen as shprehjet e pritshmërive për mandatet duke folur konkretisht edhe me numra.

Drejtuesja e qarkut Fier Belinda Balluku, theksoi se ka në objektiv 10 mandate deputetësh në atë qark për t’i ulur në parlamentin shqiptar. 

"Fieri ka një objektiv, 10 mandate deputetësh për t’i ulur në parlamentin shqiptar. Ndërkohë priten, 11 mandate nga ne. Nëse ne jemi të gjithë bashkë për Shqipërinë, me Ramën në krye nuk ka asgjë që na ndal," tha Balluku. 

Eduard Shalsi, drejtuesi politik i qarkut të Kukësit, duke folur në çeljen e fushatës tha se është i bindur se Partia Socialiste do të marrë dy mandate. 

"Të dashur miq, motra, gratë e mbledhura në pallatin e Kulturës së Hasit, nuk patëm mundësi të komunikomin, por kryeministri na përcolli një mesazh dhe ne thamë që ai kryeministër që ka bërë për gratë e këtij vendi, meriton që ju të ktheheni me dy mandate që edhe Kukësi, si gjithë Shqipëria t’i japë një mesazh të fortë Evropës", u shpreh Shalsi.

Drejtuesja politike e qarkut të Durrësit, Emiriana Sako gjatë fjalës së saj në hapjen e fushatës elektorale ka deklaruar se do të dalin fitues nga zgjedhjet me 9 deputetë. 

"Hyjmë në këtë garë si fitues me 8 deputetë, do ta përfundojmë garën të paktën me 9 deputetë. Do bëjmë çmos që vota e 11 majit të bashkojë të rinj e të moshuar tek numri 5 i fletës së votimit”, tha Sako.

Drejtuesi politik i qarkut të Lezhës, Ulsi Manja tha se Lezha, Kurbini dhe Mirdita do të votojnë PS për të marrë jo më pak se 4 mandate nga 7 qe ka qarku i Lezhës.

"Edhe ne njëlloj si gjithë të tjerët në familjen e madhe evorpiane. Lezha Kurbini dhe Mirdita do të votojnë PS për të marrë jo më pak se 4 mandate nga 7 qe ka qarku i Lezhës. Edi Rama, PS, numri 5", tha Manja.

Drejtuesi politik i qarkut të Shkodrës, Benet Beci gjatë fjalës së tij u shpreh i bindur se PS do të marrë 5 mandate në këtë qark. 

"Së paku me 5 mandate do të jemi për këtë fitore. Shumë faleminderit që Kryeministri ka kthyer kokën nga ne dhe besoj se do të jemi edhe më shumë se 5 mandate në këtë qytet", është shprehur Beci. 

Drejtuesja politike e qarkut Gjirokastër, Mirela Kumbaro theksoi gjithashtu se do blindojnë 3 mandate dhe do synojnë mandatin e katërt për një rezultat historik 4-0. 

"Gjirokastra është modeli më i artë se çfarë është në gjendje të bëjë PS dhe vizioni i kryeministrit Edi Rama, çfarë janë në gjendje të bëjnë shqiptarët kur i jep pikën e floririt, ta kthejnë në një mal, siç është Gjirokastra. Pasaportë ndërkombëtare. Do blindojmë 3 mandate dhe do synojmë mandatin e katërt për një rezultat historik 4-0", tha Kumbaro.

Drejtuesi politk i qarkut të Korçës, Niko Peleshi gjatë fjalës së tij premtoi 7 mandate në Korçë për fitoren e PS-së.

"Sot nga zemra e Shqipërisë dhe shqiptarëve, ne brohorasim dhe i ftojmë të gjithë pa dallim përtej kufirit të partive politike për Shqipërinë evropiane. 11 maji është vula e Shqipërisë evropiane. 11 maji është vula e Shqipërisë Evropiane me Edi Ramën dhe PS. Ne do sjellim 7 mandate nga Korça për fitoren e PS", tha Peleshi.

Drejtuesi politk i qarkut të Vlorës Bledi Çuçi deklaroi sot se nga 8 mandate aktuale nga ky qark presin që më 11 maj të marrin 9 mandate.

"Ndryshimi është ndjerë në çdo cep, nga riviera dhe përtej saj. Vijmë sot në shesh me 8 mandate dhe në 11 maj do të vijmë me 9 mandate. Aeroporti i Vlorës do të jetë një nga investimet që do të presë më shumë vizitorë", ka thënë Çuçi

ps