Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
POLITIKE
Publikohen fletët e votimit për zgjedhjet e pjeshme lokale të 9 nëntorit
PiranjatPërditësimi i fundit 1 Nëntor 2025, 10:05
Komisioni Qendror i Zgjedhjeve ka publikuar fletët e votimit dhe renditjen e kandidatëve për kryetar bashkie në pesë bashki ku do të zhvillohen zgjedhje të pjesshme lokale më 9 nëntor. Bëhet fjalë për bashkitë e Vlorës, Beratit, Cërrikut, Matit dhe Tepelenës. Ky proces zgjedhor vjen si pasojë e vakancave të krijuara në drejtimin e bashkive përkatëse dhe synon të rikthejë përfaqësimin lokal në këto zona.
Në këto zgjedhje të pjesshme do të garojnë gjithsej 13 kandidatë. Në tre prej bashkive do të jenë nga tre kandidatë.
Në bashkinë Vlorë do të kandidojnë Brunilda Mersini e PS-së dhe Dionis Sota i pavarur, i mbështetur nga opozita, si dhe Gjergj Nika, anëtar i PD në Këshillin Bashkiak. KQZ fillimisht e kishte refuzuar kandidaturën e Nikës, por ai e fitoi të drejtën për të garuar në Kolegjin zgjedhor.
Në bashkinë Cërrik garojnë Florenc Doka i PS-së, Eligert Hima i “Shqipëria Bëhet” të Adriatik Lapajt dhe Amarildo Hoxha, i pavarur, i mbështetur nga partitë opozitare.
Në bashkinë Mat garojnë Altin Bojni i PS-së, Suzana Pasha e pavarur (kryetare e forumit të gruas së PS në Mat) dhe Eduart Brahilika i pavarur, i mbështetur nga opozita.
Në bashkinë Berat garojnë Ervin Ceca i PS-së dhe Pavlo Shkarpa i pavarur, i mbështetur nga opozita.
Në bashkinë Tepelenë janë në garë Gramos Sako i PS-së dhe Gabriel Guma i pavarur, i mbështetur nga PD.
