Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
POLITIKE
"Rama dhe Balla do mbajnë përgjegjësi", Berisha: Avokati i kryetarit të partisë kryesore opozitare goditet vetëm në Iran, Moskë ose në Mianmar
n.fPërditësimi i fundit 30 Maj 2024, 21:11
Berisha
TIRANË- Kreu i Partisë Demokratike, Sali Berisha në fjalimin e tij të përditshëm nga ballkoni i banesës ka folur në lidhje me dhunimin e avokatit të tij, Sokol Mëngjesi. Gjatë fjalës së tij Berisha u shpreh se dhunimi i avokatit erdhi pasi ai kishte mbrojtur drejt çështjen e policit Nano, Dritan Nano dhe e kishte fituar çështjen.
Berisha shtoi se kryeministri Edi Rama dhe ministri Taulant Balla organizojnë banda për akte të tilla ndërsa theksoi dorëzimi i një prej autorëve ishte pjesë e skenarit. Kreu i PD-së shtoi se dhunimi i një avokati të kryetarit të partisë kryesore opozitare ndodh vetëm në Iran, Moskë dhe Mianmar.
"Më thoni pak ju të nderuar, të mashtruar se ata që e bëjnë me qëllim vetëm të nderuar nuk mund të jenë, si ka mundësi që 4 vetë pa maska, tre prej tyre me uniformë dhe në mes një ish-polic, po për çfarë? Sepse profesor Sokol Mëngjesi kishte mbrojtur drejt çështjen e policit Nano, Dritan Nano dhe e kishte fituar çështjen.Po cila mendje e mbrapshtë njerëzore e çon në nivel kafshe, në nivel shtaze një njeri që me avokatin fiton çështjen dhe tani kërkon t’i marrë jetën? Kujt ia thoni ju këto?
Po këtë e bën një mendje si Edi Rama e Taulant Balla që organizojnë banda për akte të tilla. Më thoni pak, po do thoni pse u dorëzua? Edhe dorëzimi ishte pjesë e skenarit. Ndaj edhe njëherë miq, atentati ndaj avokatit të nderuar, ndaj akademikut të shquar Sokol Mëngjesi është një sulm, është një atentat ndaj opozitës. Nga narkopushteti, nga Edi Rama, nga Taulant Balla, nga falangat e tyre të krimit. Le t’i pyesim pak, po pse për miqësi me Dritan Nanon, tre banditë vendosën të ekspozojnë veten si banditët, si agresorë primitivë në qendër të Tiranës. Jo mo jo, kurrë. Për Dritanin ata nuk shkonin as në kafene.
Dritani ka qenë pjesë e skenarit. Për Dritanin ata nuk çanin kokën. Dhe tani na thoni se kemi edhe regjistrime. Sigurisht që keni regjistrime se jeni vetë skenaristë. Dhe skenarit nuk i mungojnë regjistrimet. Me këtë rast, miqtë e mi, së fundmi u them këtyre magneteve të shpifjeve dhe trillimeve të Edi Ramës, është turp t’i besoni kaq lehtë. Ku ndodh të goditet avokati i kryetarit të partisë kryesore opozitare? Kjo ndodh në Iran, kjo ndodh në Moskë, kjo ndodh në Mianmar, kjo ndodh në diktaturë. Po në cilin vend ka ndodhur kjo, na thoni pak ju?" tha ai.
Më tej Berisha tha se Rama dhe Balla do mbajnë përgjegjësi për sulmin ndaj avokatit Mëngjesi. Ai më tej shtoi se kjo betejë po ecën drejt fazave vendimtare.
"Pra, le t’i urojmë shërim të shpejtë profesorit të nderuar dhe të garantojmë binomin Rama-Balla se janë përgjegjës dhe do mbahen përgjegjës për aktin e tyre banditesk në qendër të Tiranës. Miqtë e mi, kjo betejë po ecën drejt fazave vendimtare. Beteja vendimtare është beteja e mbarë shqiptarëve. Është betejë e atdhetarëve që e duan këtë vend. Është betejë e qytetarëve që e duan lirinë. Është betejë e burrave dhe grave, djemve dhe vajzave, të gatshëm për sakrifica për dinjitetin e tyre. Ndaj dhe ju ftoj me zemërim, revoltë të ecim të sigurt drejt përmbysjes së këtij regjimi. Qeverisë teknike, zgjedhjeve të lira. Rrofshi ju. Rroftë Shqipëria," përfundoi Berisha.
