REL: Kryetari i bashkisë së Tiranës, Erion Veliaj shoqërohet në Polici

TIRANA- Kryetari i bashkisë së Tiranës, Erion Veliaj, është marrë nga zyra e tij dhe është dërguar në stacionin e Policisë së kryeqytetit të hënën, thanë burimet për Radion Evropa e Lirë. As Policia e as Struktura e Posaçme kundër Korrupsionit (SPAK) ende nuk kanë njoftuar rreth kësaj çështjeje, që besohet se ka të bëjë me korrupsion. Sipas burimeve, Gjykata e Posaçme ka urdhëruar që Veliaj të dërgohet në paraburgim, ndërsa bashkëshortja e tij të mbahet në arrest shtëpiak.

Ai u ndalua bazuar në një hetim të nisur vitin e kaluar në lidhje me dyshimet për veprën penale, “korrupsion pasiv i funksionarëve të lartë shtetërorë ose i të zgjedhurve vendorë”, pas një referimi të dorëzuar në SPAK më 8 shkurt të 2024. Në fund të dhjetorit, Veliaj ishte thirrur në Posaçme kundër Korrupsionit. Ai u tha gazetarëve se ishte denoncua në mënyrë anonime nga një person i quajtur Nesti Angoni.

"Ky person nuk ekziston, e dimë çfarë emri dhe kulture linçuese përfaqëson ky stil. Është një kurth i sajuar. Jam sulmuar nga Nesti Angoni për të na kthyer pas te praktika e letrave anonim", tha Veliaj asokohe.

Ai pati theksuar më 26 dhjetor pasi u thirr në SPAK se "do të ishte shqetësuese nëse nuk do të paraqitej para Prokurorisë së Posaçme se nuk bënte pjesë te ata politikanë që e sulmojnë SPAK-un kur i heton”. I pyetur për këtë çështje, kryeministri Edi Rama pati deklaruar gjatë konferencës së fundvitit me gazetarët se ndaj Veliajt po bëhej gjyq publik, dhe se ai do të mbante qëndrim në kohën e duhur.

Reagimi i parë pas shoqërimit të Veliajt të hënën erdhi nga Lulzim Basha, i cili më herët ka drejtuar bashkinë e Tiranës dhe Partinë Demokratike. Ai tha se “Veliaj me mbështetjen e kryeministrit Edi Rama e ktheu bashkinë e Tiranës në vatër korrupsioni”.

"Përshëndes vendosmërinë e SPAK për t’i shkuar deri në fund aferave korruptive dhe inkurajoj institucionet e drejtësisë të veprojnë pa asnjë hezitim kundër korrupsionit në nivelet e larta, që shkatërron mirëqenien e familjeve shqiptare", tha Basha./ REL

erion veliaj