Një pedagoge ka shpërthyer kundër kryeministrit Edi Rama, duke e cilësuar si turpin e vendit, dhe duke shtuar se ai duhet të largohet...
POLITIKE
Shpenzimet e mbrojtjes, Strategjia: Pajisjet dhe investimet 20% të buxhetit të Mbrojtjes
M.B.Përditësimi i fundit 24 Qershor 2024, 14:39
Foto ilustruese
TIRANA- Qeveria synon që investimet për pajisje dhe investime të mos jenë nën 20 për qind e totalit të buxhetit të Ministrisë së Mbrojtjes. Strategjia Ushtarake e Republikës së Shqipërisë dorëzuar në Kuvend prej pak ditësh nënvizon ndër të tjera objektivat për shpenzimet për të qenë në harmoni me zotimet që insitucionet kanë marrë karshi traktateve ndërkombëtare.
“Për të garantuar përmbushjen e misionit kushtetues dhe arritjen e objektivave strategjikë kjo strategji mbështet një buxhet të Mbrojtjes në nivelet e kërkuara. Në përmbushje të detyrimeve nën nenin 3 të Traktatit të Uashingtonit dhe në zbatim të vendimit të marrë nga krerët e vendeve aleate në Samitin e NATO-s në Vilnius 2023, do të synohet që buxheti i Mbrojtjes të jetë jo më pak se dy për qind i Prodhimit të Brendshëm Bruto dhe shpenzimet për investime dhe pajisje e armatime të jenë në 20 për qind të buxhetit të Mbrojtjes, sikurse është pranuar edhe në Deklaratën e Samitit të Uellsit.
Përdorimi i burimeve të Mbrojtjes në FA do të bëhet në mënyrë të balancuar ndërmjet tri kategorive kryesore të shpenzimeve (personeli, operacionet dhe mirëmbajtja, si dhe investimet për modernizimin dhe infrastrukturën), për të siguruar zhvillim harmonik e të integruar të të gjitha fushave të mbrojtjes”, thuhet në dokument.
Ndërkohë strategjia nënvizon se burimet financiare për sigurimin e shpenzimeve të mbrojtjes dhe përmbushjen e detyrimeve në kuadër të mbrojtjes kolektive, sigurohen nga buxheti i Mbrojtjes, buxheti i përbashkët i Aleancës, si dhe nga programet e bashkëpunimit ushtarak dypalësh.
“Duke qenë se FARSH kanë nevoja në rritje për burime financiare, krijimi i kapaciteteve do të fokusohet në prioritete të mirë përcaktuara, me një menaxhim më të mirë, transparent dhe efikas të financave. Për të përballuar sfidat aktuale të mjedisit të sigurisë dhe ato që priten prej zhvillimeve teknologjike, vendet kanë vendosur të rrisin investimet në mbrojtje dhe mbajtur hapin me shkallën dhe kompleksitetin e ndryshimeve dhe zhvillimeve teknologjike.
Duke qenë se siguria e Aleancës është e lidhur me sigurinë e vendit tonë, do të përmbushen detyrimet për barrën financiare, do të zhvillohen aftësitë dhe kapacitetet për të menaxhuar një gamë të gjerë krizash, si dhe do të rritet kontributi në operacionet dhe misionet e NATO-s”, thuhet në strategji./ Monitor
