Një pedagoge ka shpërthyer kundër kryeministrit Edi Rama, duke e cilësuar si turpin e vendit, dhe duke shtuar se ai duhet të largohet...
POLITIKE
Si gënjente Veliaj për të fshehur masakrën urbane të parave të pista
I.APërditësimi i fundit 1 Nëntor 2024, 14:01
TIRANË- Ndërtimet në Tiranë janë kthyer në një fenomen negativ, për sa i përket zhvillimit të qytetit. Me ndërtimin e kullave gjigande apo dhe të pallateve të reja pa kriter, që kanë mbetur të pa banuara, qyteti tashmë vuan mungesën e hapësirave të gjelbërta, ajrit të pastër apo dhe betonizimit të vendit.
Por vetë kryebashkiaku Erion Veliaj, vitin që lam pas, duke u munduar që të arsyetojë ndërtimet e shumta në Tiranë, ka deklaruar se ka kërkesë të madhe në treg. Sipas tij janë rreth 20 deri në 25 mijë qytetarë që vijnë në Tiranë për të jetuar çdo vit.
"Ka kërkesë, por ka edhe ofertë. Të dyja duhet të ecin paralelisht. Tiranës nuk ia vëmë dot traun për këta 20-25 mijë qytetarë që na bashkohen çdo vit. As nuk e ndajmë dot në vendalinj e të ardhur, sepse ajo është një gjuhë raciste e viteve ’90 që nuk duhet të ekzistojë më," tha Veliaj.
Por sipas shifrave të publikuara nga gazetarja Ola Xama të 'Censit 2023', në Tiranë vijnë mesatarisht 3.396 banorë në vit dhe jo 25 mijë që Veliaj ka deklaruar para kamerave.
"Tashmë është zyrtare nga vetë INSTAT: numri i popullsisë në kryeqytet është rritur me 40.754 banorë (2011-2023), ose mesatarisht 3.396 banorë në vit," shkruan Xama bazuar në shifrat e INSTAT.
Më tej Veliaj për të justifikuar ndërtimet tej mase në Tiranë, duhen rreth 8 mijë banesa të reja çdo vit, në mënyrë që të plotësohet tregu. Sipas tij numri i metrave katrorë në Tiranë përputhet me numrin e rritjes së banorëve, por një gjë e tillë nuk është e vërtetë, bazuar në faktet zyrtare të INSTAT.
"8 mijë banesa, me nga një mesatare prej 100m2, përfshirë hapësira të përbashkëta, shkallë e ashensorë, janë rreth 800 mijë m2 ndërtim i ri i kërkuar nga tregu çdo vit në Tiranë. Atëherë, përfundimi është i thjeshtë: Numri i metrave katrorë të ndërtuara në Tiranë, përputhet proporcionalisht me numrin e rritjes së banorëve të Tiranës," tha Veliaj.
Gazetarja Ola Xama me shifrat e 'Censit 2023' ka nxjerr bllof kryebashkiakun Veliaj, për numrin e ndërtesave në Tiranë. Sipas shifrave për të mbushur 52 871 banesat që janë bosh aktualisht në qytet, me ritmet e prurjeve aktuale duhen 45 vjet.
"Pjestuar për 3 që është numri mesatar i anëtarëve të familjeve për Tiranën, qytetit nuk i shtohen dot më shumë se 1.132 familje në vit, ndërsa volumi i lejeve të ndërtimit që jepet për rezidenca banimi shton ofertën çdo vit me të paktën 8 mijë shtëpi. Vetëm që të mbushen 52 871 banesat që janë bosh, sikur ritmi i rritjes së popullsisë të mbetet i pandryshuar, do të duhen 45 vjet," shkruan Ola Xama.
Po ashtu Veliaj janarin që lam pas ka deklaruar se nëse nuk shtohen 8 mijë banesa çdo vit në Tiranë, atëherë çmimet e banesave aktuale do të bëheshin të papërballueshme për shqiptarët dhe do të rriteshin në mënyrë eksponenciale
"Ne duam ta bëjmë këtë një qytet më të mirë për të gjithë. Nëse nuk shtohet oferta për banesa të reja, atëherë çmimet e banesave ekzistuese do të bëheshin të papërballueshme dhe do të rriteshin në mënyrë eksponenciale," tha Veliaj.
Në fakt çmimi i banesave në Tiranë, në 5 vitet e fundit janë rritur më shifra alarmante. Sipas të dhënave të publikuara nga 'Monitor', brenda një viti çmimet janë rritur me 30%, duke u bërë me mbi 1000 euro metri/katror në periferi dhe me mbi 2000 euro metri/katror në qendër. Edhe pse me çmime kaq të larta dhe me dhjetra mijë apartamente të pashitura, ndërimet në Tiranë vazhdojnë ende me ritme të larta.
Këto ndërtime që vijojnë dhe shtohen edhe pse ngelen të pashitura kanë vetëm një shpjegim, pastrimi i lekëve të pista që po bëhet në këtë sektor. Teksa ndërtuesit vijojnë dhe shtojnë ndërtimet edhe pse nuk marrin kostot e shpenzimeve të tyre mbrapsht, sipas ekspertëve, shpjegimi i vetëm është se sektori i ndërtimit është streha e re për të pastruar paratë e krimit./Dosja.al
