"S’kam fare punë me skemën e TVSH-së, e ka në dorë ministria e Financave", Denaj: Fondet e IPARD mbeten të bllokuara deri në korrik

Denaj

TIRANË- Fondet e Bashkimit Europian për fermerët shqiptarë do të jenë të bllokuar të paktën deri korrikun e vitit 2025. Gjatë komisionit të Ekonomisë ministrja e Bujqësisë, Anila Denaj u pyet nga deputetja demokrate, Emilia Koliqi për zhbllokimin e tyre. Gjatë fjalës së saj Denaj u shpreh se deri në korrik të vitit të ardhshëm nuk mund të ketë zhvillime në këtë drejtim. Ajo theksoi se deri në korrik do të jenë në zbatim të planit të veprimit dhe pas muajit korrik do të jenë në gjendje të thërrasim DigiAgri për të dërguar dokumentet për IPARD 3.

“Ne po ekzekutojmë planin e veprimit për ndryshime të rëndësishme në strukturat në përmirësim të Agjencisë në Pagesave ABZHR, struktura është duke përfunduar, dhe një nga kërkesat shtesë ishte që strukturat të rrisnin kapacitetet për parandalime, për kontrolle dhe më shumë vëmendje për digjitalizimin e sistemeve. Këto po zhvillohen dhe po plotësohen me staf. Deri në korrik ne do të jemi në zbatim të planit të veprimit dhe pas muajit korrik ne do të jemi në gjendje të thërrasim DigiAgri për të dërguar dokumentet për IPARD 3”, tha ajo.

Ministri i Financave, Petrit Malaj gjatë komisionit tha se për t’u hequr TVSH-ja në bujqësi duhet propozimi i ministrisë së kësaj fushe ndërsa ajo e kundërshtoi. Deputeti Erion Braçe  tha se TVSH-ja për produktet bujqësore ka shtuar informalitetin ndërsa Denaj u shpreh se një masë të tillë e propozon ministria e Financës.

Ajo theksoi se ka rënë dakord me ministrin Malaj për të ngritur një grup të përbashkët për të parë efektivitetin e skemës si dhe pjesën e TVSH-së që i takon Ministrisë së Financave. Sipas saj ajo nuk ka fare punë me skemën e TVSH-së.

“Formalizimi i ekonomisë bujqësore është i ulët, faturat janë in-ekzistente, por unë nuk mundem që brenda një funksioni që nuk e kemi ne të ushtroj kontrolle fiskale tek qendrat e grumbullimit. Ne do të ishim shumë të kënaqur që të rishikohet skema e rimbursimit të TVSH-së, në momentin që Ministria e Financave është e gatshme ta bëjë këtë gjë.

Kemi rënë dakord me ministrin Malaj për të ngritur një grup të përbashkët për të parë efektivitetin e skemës si dhe pjesën e TVSH-së që i takon Ministrisë së Financave. Nëse më kërkohet mua se çfarë mendoj me skemën e TVSH-së, jam shumë dakord të bëhet. Kjo nuk më jep të drejtën të flas për skemën se nuk është në përgjegjësi të Ministrisë së Bujqësisë. S’kam unë fare punë me Skemën e TVSH-së”, tha Denaj.

anila denaj tvsh