SPAK lejoi familjarët ta vizitojnë, Veliaj zhvillon takim me vëllain e tij në paraburgimin e Durrësit

erion veliaj

TIRANË- Kryebashkiaku i Tiranës, Erion Veliaj, i cili ndodhet në qelitë e paraburgimit në Durrës ka zhvilluar sot takim me vëllain e tij, Arbër Veliajn. Vëllai i kryebashkiakut ka qenë gjithashtu nën hetim nga SPAK, por sipas dosjes paraprake ndaj tij nuk është caktuar asnjë masë sigurie.  Më herët gjatë ditës së sotme  Prokuroria e Posaçme ka vendosur të lejojë që Veliaj të vizitohet nga familjarët e tij. SPAK ka firmosur autorizimin që u jep leje familjarëve të ngushtë të takojnë Veliajn. 

Veliaj u arrestua në zyrën e Bashkisë më 10 shkurt si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”. Bashkëshortja e kryebashkiakut, Ajola Xoxa është lënë në masë sigurimi "detyrim paraqitje". 

Sipas SPAK nga të dhënat konkrete të mbledhura deri në këtë fazë të hetimit paraprak, në mënyrë të përmbledhur rezulton se, nga personat nën hetim, specifikisht Veliaj edhe bashkëshortja e tij është ideuar, krijuar dhe vënë në funksionim një mekanizëm që ka synuar dhe ka bërë të mundur, në praktikë, marrjen e përfitimeve të parregullta, të cilat burojnë nga fondet publike që administrohen nga Bashkia Tiranë, përmes titullarit të saj, me qëllim pasurimin personal të këtij të fundit dhe familjes së tij, përmes veprimeve të kamufluara dhe të  kundërligjshme.

erion veliaj arber veliaj