Sindikata e Punonjësve të Universiteteve të Shqipërisë (SPUSH) i është bashkuar reagimeve ndaj dhunës policore ndaj st...
POLITIKE
"Të mos ndodhin në të ardhmen!" Sulmi me vezë dhe kos ndaj Belerit në Tiranë, Presidenti i PPE-së letër Ramës: Nuk keni marrë masa për ta parandaluar aktin e turpshëm ndaj një eurodeputeti
M.B.Përditësimi i fundit 15 Nëntor 2024, 11:08
TIRANA- President i Partisë Popullore Evropiane, Manfred Weber i ka dërguar një letër kryeministrit Edi Rama ku dënon incidentin e ndodhur (ne sulmin me vezë dhe kos) ndaj eurodeputetit Fredi Beleri, pranë kryesisë së Kuvendit teksa po merrte pjesë në takimet e delegacionit europian në kuadër Komisionit Parlamentar të Stabilizim-Asociimit BE-Shqipëri më 29 tetor.
Në letrën e tij, Weber nënvizon se eurodeputeti, me statusin diplomatik të anëtarit të këtij misioni të Delegacionit të Parlamentit Evropian, është sulmuar verbalisht dhe fizikisht nga një protestues gjatë daljes nga Kuvendi i Shqipërisë.
Po ashtu Weber shkruan në letrën drejtuar Ramës se sulmi përbën një dështim të shtetit pritës për të garantuar sigurinë dhe integritetin e një përfaqësuesi të zgjedhur të qytetarëve të Bashkimit Europian. Gjithashtu Weber bën thirrje që incidente të ngjashme të mos ndodhin në të ardhmen, duke respektuar angazhimet ndërkombëtare, në përputhje me rrugën e anëtarësimit të Shqipërisë.
“Sulmi verbal dhe fizik ndaj z. Beleri para Kuvendit të Shqipërisë përbën një dështim të shtetit pritës për të garantuar sigurinë dhe integritetin e një përfaqësuesi të zgjedhur të qytetarëve të Bashkimit Europian. Asnjë masë nuk është marrë për të parandaluar këtë sulm të turpshëm ndaj një eurodeputeti në mes të misionit të tij zyrtar. Gjatë incidentit, ka pasur një mungesë të dukshme të ndonjë forme të mbrojtjes shtetërore.
Nëse do të kishte pasur ndonjë mbrojtje shtetërore dhe do të ishin dhënë masat e duhura sigurie nga shteti shqiptar, ky incident i papranueshëm mund të ishte parandaluar. Duke marrë parasysh seriozitetin e këtij incidenti, të cilin unë e dënoj fuqishëm, ju bëj thirrje që të siguroheni që incidente të ngjashme të mos ndodhin në të ardhmen, duke respektuar angazhimet tuaja ndërkombëtare, në përputhje me rrugën e anëtarësimit të Shqipërisë”, shkruan Weber.
