Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
POLITIKE
"Të përbashkohemi rreth një aleance", Berisha: Mesazhi më i rëndësishëm që duhet dhënë është bashkimi!
n.fPërditësimi i fundit 11 Qershor 2024, 21:22
Berisha
TIRANË- Kreu i Partisë Demokratike, Sali Berisha ka mbajtur fjalën e tij si çdo mbrëmje para mbështetësve. Gjatë fjalës së tij Berisha ka shprehur entuziazimin për vendimin e marrë sot nga Gjykata e Apelit për vulën e PD-së.
Berisha u bëri thirrje demokratëve që të jenë të bashkuar pasi sipas tij kontributi i secilit është i vyer. Ai më tej shtoi se mesazhi më i rëndësishëm që duhet dhënë është bashkimi.
"Por miqtë e mi, të mos kemi keqkuptime. Beteja vazhdon. Narkoshteti nuk donte që ne të merrnim këtë flamur sot. Edi Rama sonte flet me vete, nuk fle.Prandaj betejat më të nxehta, ne i kemi para. Dhe sot mesazhi më i rëndësishëm që duhet dhënë dhe që duhet të japim çdo ditë është vetëm një: bashkim, bashkim, bashkim!
Demokrate e demokratë, sot nuk ka më parti me vulë, parti pa vulë. Sot nuk ka më PD të vërtetë, PD të pavërtetë. Sot ka vetëm një Parti Demokratike, e bashkuar rreth flamurit të saj, flamurit të lirisë, flamurit të fitores. Sot ka vetëm një opozitë të bashkuar. Një parti uragan i pamposhtur opozitar që do sjellë rotacionin dhe do ta shkatërrojë narkoshtetin e Edi Ramës, ashtu siç Edi Rama tentoi të shkatërrojë flamurin tonë!
I bëj thirrje pra edhe njëherë, atyre atyre demokratëve që ende nuk na janë bashkuar. Kontributi i secilit është i vyer. Investimi i tyre kurrë nuk mohohet. Në protestën madhështore të 20 shkurtit, ne e vërtetuam se të bashkuar në diversitet, është formula ynë fituese. Ndaj mos hezitoni të na bashkoheni sa më shpejt. Ju mirëpresim!
I bëj thirrje çdo opozitari që nuk është pjesë e Partisë Demokratike. Opozitarëve të vjetër dhe atyre të rinjve. Partive të mëdha dhe atyre të vogla. Nëse jeni kundër Edi Ramës. Nëse jeni kundër narkoshtetit. Nëse jeni kundër inceneratorëve. Kundër vjedhjeve 100%. Kundër krimit. Dhe mbi të gjitha kundër shpopullimit. Atëherë t’i bashkojmë forcat. Mund të mos jeni me Partinë Demokratike, por pa Partinë Demokratike nuk e rrëzoni dot Ramën. Prandaj dyert tona janë të hapura për çdo opozitar të vërtetë," tha ai.
Berisha u bëri thirrje demokratëve të përbashkohen rreth këtij flamuri dhe në një aleancë historike shqiptare ndërsa shtoi se së bashkë do shpëtojnë Shqipërinë.
"Dhe i bëj thirrje çdo shqiptari. Partia Demokratike qëndroi për të vërtetën. Ajo po rikthehet. Nëse jeni pro familjes. Nëse jeni për paga të dyfishuara. Nëse jeni për dinjitetin e shqiptarëve. Nëse jeni për interesin kombëtar. Nëse jeni për demokracinë. Atëherë ky është flamuri juaj. Ky është flamuri i fitores që do ta shembë narkoshtetin.
Prandaj ju ftoj të përbashkohemi rreth tij dhe në një aleancë historike shqiptare, bashkë të shpëtojmë Shqipërinë.Për ta mbyllur, edhe njëherë një falenderim dhe mirënjohje e pakufishme për gjithë demokratët që nisën lëvizjen me Kuvendin e 11 dhjetorit. Nje falenderim për foltoret. Një falenderim për qëndresën tuaj në Rrugën e Shpresës, qëndrestare dhe qëndrestarë të pamposhtur.
Një falenderim që Rithemelimin e kthyet në një histori suksesi. Një falenderim për këtë faqe të re që shkruajtët në historinë e demokracisë së Shqipërisë. Rrofshi ju! Rroftë Partia Demokratike! Rroftë flamuri blu! Rroftë Shqipëria!" tha Berisha.
