Turi në Ballkan/ Sot zhvilloi takimin në Presidencë, përfundon vizita zyrtare e Von der Leyen në Tiranë

ursula von der leyen

TIRANË- Presidentja e Komisionit Europian ka zhvilluar sot një takim me presidentin Bajram Begaj. Mësohet se takimi mes tyre ka zgjatur rreth 20 minuta, ndërsa fokusi i diskutimeve ishte integrimin i Shqipërisë në Bashkimin Europian.  Ky takim shënon dhe mbylljen e vizitës së saj zyrtare në vendin tonë.

Presidentja e KE mbërriti ditën e djeshme në vendin tonë, ku u prit nga kryeministri Edi Rama. Pas takimit mes tyre, mbajtën edhe një konferencë për mediat. Ajo tha gjatë fjalës së saj në konferencën me mediat se Shqipëria po bën hapa të mëdhenj drejt Bashkimit Evropian. Po ashtu bashkë me Ramën morën pjesë në ceremoninë e hapjes së Kolegjit të Europës në kryeqytet.

Pas Shqipërisë, presidentja e KE, Ursula von der Leyen do të shkojë në Maqedoninë e Veriut ku do të takohet me kryeministrin, Hristjan Mickoski dhe presidenten, Gordana Siljanovska-Davkova. Po të enjten ajo do të vizitojë Bosnjën e Hercegovinën, ku fillimisht pritet t’i vizitojë zonat e prekura nga përmbytjet e fundit vdekjeprurëse. Axhenda e saj në Bosnjë nuk përfundon këtu pasi Von der Leyen do të ketë një takim në Presidencën e Bosnjë e Hercegovinës.

Nga Bosnja, ajo do të shkojë në Serbi, ku do të takohet me presidentin, Aleksandër Vuçiç dhe kryeministrin Millosh Vuçeviç. Ditën e fundit të turneut, presidentja Ursula von der Leyen do qëndrojë për vizitë në Kosovë, kurse më pas do të shkojë në Mal të Zi, ku do të takohet me presidentin Jakov Milatoviç dhe kryeministrin Milojko Spajiç.

 ursula von der leyen bajram begaj