"U votua një kërkesë personale e Bardhit për të më emëruar forcërisht!" Açka kërkesë Kuvendit për të ndryshuar Komision: Dua të shkoj te Ligjet

TIRANA- Deputetja opozitare Flutura Açka ka bërë një kërkesë për të ndryshuar Komision drejtuar Kuvendit. Kërkesa e Açkës është shoqëruar dhe me akuza ndaj kreut të Grupit Parlamentar të Partisë Demokratike Gazment Bardhit.

Açka ka bërë të ditur se do të marrë pjesë në Komisionin për Çështjet Ligjore, Administratën Publike dhe të Drejtat e Njeriut. Gjithashtu ajo ka bërë të ditur se zgjedhja e saj për Komisionin e Edukimit dhe Mjeteve të Informimit Publik është bërë forcërisht nga drejtuesit e Grupit Parlamentar të PD-së. Ndërkohë, pritet që kjo kërkesë e saj të votohet në Kuvend sot.

"Të Nderuar,

Në seancën e datës 27.07.2024, në shkelje të Rregullores se Parlamentit, është votuar një kërkesë personale e drejtuesit të Grupit Parlamentar të Partisë Demokatike, për të më emëruar forcërisht anëtare e Komisionit për Edukim dhe Mjetet e Informimit Publik, pas shantazheve të vazhdueshme të hapura dhe të fshehta të tij dhe të një shpure të vogël rreth tij, intimidime politike dhe personale, kundër rolit tim si Kryetare e Komisionit për Edukim dhe Mjetet Publik, gjë që më shtynë të jap dorëheqjen, e votuar kjo më datë 16.07.2024 nga Kuvendi i Republikës së Shqipërisë. Pra, prej datës 26.07.2024 unë kam qenë deputete jashtë grupeve parlamentare, dhe në përputhje me Rregulloren e Parlamentit të Shqipërisë, është në zgjedhjen time personale se në cilin komision prlamenta dëshiroj të kontribuoj. Në këto kushte, do të dëshiroja të merrja pjesë si anëtare e:

Komisionit për Çështjet Ligjore, Administratën Publike dhe të Drejtat e Njeriut,

Si një komision që përfshin dhe përpunon çështje të interesit tim politik, publik dhe personal

Duke ju falenderuar për mirëkuptimin", shkruhet në kërkesë.

kuvend