Tensione janë shënuar gjatë protestës së studentëve dhe pedagogëve para Ministrisë së Arsimit, ku policia ka nd&e...
SHOWBIZ
Aktorja rrëfen pse nuk zgjodhi kurrë të adoptojë fëmijë: Mund të duket egoiste, por dua ADN-në time
PiranjatPërditësimi i fundit 14 Tetor 2025, 15:09
Aktorja e njohur hollivudiane, Jennifer Aniston, ka folur hapur për një nga çështjet më të diskutuara në jetën e saj personale, vendimin për të mos pasur fëmijë dhe përse kurrë nuk ka zgjedhur të adoptojë.
Gjatë një interviste në podkastin “Armchair Expert” të Dax Shepard, Aniston u shpreh se gjithmonë ka pasur dëshirë të ketë një fëmijë biologjik, por për shkak të problemeve shëndetësore dhe pamundësisë për të mbetur shtatzënë, kjo ëndërr nuk u realizua. Megjithatë, ajo sqaroi se nuk e ka parë kurrë si alternativë adoptimin.
“Nuk do të adoptoj. Dua ADN-në time tek një person i vogël. Mund të duket egoiste, por këtë ndjenjë e kam pasur gjithmonë”, tha Aniston.
Ylli i serialit të famshëm “Friends” pranoi se ka kaluar një periudhë të vështirë gjatë përpjekjeve për të mbetur shtatzënë dhe i është nënshtruar trajtimeve të ndryshme, përfshirë fertilizimin in vitro (IVF). Ajo tregoi se ndonëse procesi ka qenë i lodhshëm fizikisht dhe emocionalisht, sot ndihet në paqe me faktin që nuk është bërë nënë.
“Ka ardhur një moment kur e kuptova se nuk është më në duart e mia. Nuk kishte më asgjë që mund të bëja për ta ndryshuar këtë realitet,” shtoi ajo.
Aniston, tashmë 56 vjeç, tha se ka vendosur të flasë hapur për këtë temë për të ndihmuar gratë që përballen me presionin shoqëror për të pasur fëmijë. Ajo kritikoi gjykimet që i janë bërë ndër vite në media, duke theksuar se për shumë kohë është etiketuar si “e ftohtë” apo “karrieriste” vetëm sepse nuk kishte fëmijë.
“Kam shumë dashuri në jetën time, një familje të zgjeruar, miq të vërtetë dhe një ndjenjë të thellë paqeje. Kjo është mënyra ime e të qenit nënë, ndoshta jo në mënyrë biologjike, por me zemër”, përfundoi aktorja.
