Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
SHOWBIZ
E paditën për rikonstruksionin e shtëpisë së saj luksoze, Rita Ora fiton betejën ligjore me fqinjët e saj
PiranjatPërditësimi i fundit 1 Tetor 2025, 12:00
Këngëtarja Rita Ora ka fituar betejën ligjore kundër fqinjëve të saj në veri të Londrës, duke marrë lejen për ndërtimin e një palestre moderne në kopshtin e vilës së saj luksoze, e vlerësuar në 7.5 milionë paund (rreth 8.5 milionë euro).
Projekti, i cili përfshin ndërtimin e një objekti të stilit bashkëkohor me dritare të mëdha xhami, ishte përballur me kundërshtime nga banorët e zonëz, të cilët pretendonin se ndërtimi do të cënonte qetësinë, privatësinë dhe pamjen natyrore të zonës që konsiderohet si trashëgimi kulturore.
Në ankesat kolektive të paraqitura në Këshillin e Camden-it, fqinjët e Orës u shprehën të shqetësuar për ndikimin e mundshëm të palestrës në ambient dhe stilin e jetesës së tyre. Ata e cilësuan projektin si një “shëmtim vizual” dhe paralajmëruan se dyert e mëdha me xhama mund të sillnin ndriçim të tepërt, muzikë të lartë dhe humbje të privatësisë, duke krijuar potencial për tensione dhe ankesa ligjore.
“Banorët që kanë zgjedhur këtë zonë për qetësinë e saj nuk duhet të detyrohen të jetojnë me ndriçim artificial dhe zhurma konstante”, thuhej në njërën nga letrat zyrtare. Ata rikujtuan gjithashtu se vetë Rita kishte folur publikisht për rëndësinë e ruajtjes së gjelbërimit dhe biodiversitetit në kopshtin e saj, të cilin e kishte përshkruar si “një strehë për fluturat dhe shpendët”.
Në një video të mëparshme në YouTube, këngëtarja kishte treguar me krenari kopshtin e saj të veçantë, duke thënë: “Ky është një vend ku vendosim një batanije, shijojmë aromën e luleve dhe kalojmë kohë në qetësi. Këtu qëndrojnë fluturat. S’dua të vendos shumë ndriçim sepse thelbi i kësaj hapësire është të mbetet një kopsht.”
Megjithatë, pavarësisht reagimeve të komunitetit lokal, autoritetet e Këshillit të Camden-it e kanë miratuar projektin, duke vlerësuar se ndërtimi është në përputhje me rregulloret urbanistike dhe nuk shkel ndonjë ligj ekzistues.
Një burim pranë këngëtares tha për “The Sun” se Rita ka qenë gjithmonë e kujdesshme që të veprojë në përputhje me ligjin. “Ajo nuk ka synim të shqetësojë askënd. Ka ndjekur çdo procedurë të nevojshme dhe nuk do ta kishte marrë lejen po të ishte në kundërshtim me rregullat.”
Përfaqësuesit zyrtarë të Rita Orës ende nuk kanë komentuar publikisht lidhur me vendimin përfundimtar.
