Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
SOCIALE
Domosdoshmëri apo fiksim? Kufizimi i rrjeteve sociale tek të rinjtë, ja 'trendi' i ri që disa vende të botës po i qasen
PiranjatPërditësimi i fundit 1 Tetor 2025, 14:46
Një trend i ri po përhapet në disa shtete, ku qeveritë po marrin masa të forta për të kufizuar përdorimin e rrjeteve sociale nga të rinjtë, duke e parë si domosdoshmëri për të mbrojtur shëndetin mendor, edukimin dhe sigurinë e fëmijëve.
Në Australi, ndalimi i rrjeteve sociale për adoleshentët nën 16 vjeç ka marrë vlerësime pozitive edhe në skenën ndërkombëtare, përfshirë një reagim të fortë në Asamblenë e OKB-së, ku u cilësua si një hap i guximshëm për të ulur varësinë dixhitale, bullizmin online dhe ekspozimin ndaj përmbajtjeve të rrezikshme.
Në Shqipëri, qeveria vendosi bllokimin e aplikacionit TikTok për një vit, pas rasteve të shumta ku u konstatuan se përmbajtjet e shpërndara në platformë nxisnin dhunë dhe sjellje të papërshtatshme mes të rinjve. Vendim ky që u prit me qëndrime të ndryshme, ku një pjesë e prindërve dhe ekspertëve e konsideruan të nevojshëm, ndërsa të tjerë e panë si kufizim të lirive të shprehjes.
Edhe vende të tjera kanë marrë hapa të ngjashëm. Franca ka miratuar ligje që ndalojnë hapjen e llogarive në rrjete sociale pa lejen e prindërve për fëmijët nën 15 vjeç. SHBA po diskuton ligje federale dhe shtetërore për të kufizuar qasjen e të miturve në platformat më të mëdha, sidomos TikTok, Instagram dhe Snapchat. Ndërkohë, në Korenë e Jugut tashmë ekzistojnë kufizime të gjera për përdorimin e internetit gjatë orëve të natës nga të miturit, si pjesë e masave për të frenuar varësinë dixhitale./ Piranjat.al
