Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
SOCIALE
Të dhënat: 2023, investimet e biznesit në ndërtesa në nivelin më të ulët në 12 vite
M.B.Përditësimi i fundit 5 Maj 2025, 15:46
TIRANA- Investimet e biznesit në toka dhe ndërtesa pësuan rënie të mprehtë në vitin 2023 në raport me 2022, referojnë të dhënat zyrtare të INSTAT. Investimet në ndërtesa shënuan një vlerë prej 23,8 miliardë lekësh në 2023 me rënie vjetore 39%, duke shënuar nivelet më të ulëta që nga viti 2011, referojnë të dhënat zyrtare.
Rënie shënuan edhe investimet e bizneseve në toka. Në 2023 ndërmarrjet investuan gjithsej në ndërtesa 16.7 miliardë lekë më rënie 25 për qind në krahasim me vitin paraardhës. Të dhënat tregojnë se bizneset shqiptare investojnë më shumë në ndërtesa se sa në toka. Psh në vitin 2023 ato ishin 42 për qind më të larta dhe në vitet paraardhëse diferenca ishte edhe më e lartë.
Përgjatë 2010-2023 vlera më e lartë e investimit të bizneseve ne ndërtesa arriti në vitin 2016 me 93 miliardë lekë. Vlerat ishin të larta edhe në vitet e 2015 dhe 2018 (shiko grafikun e mëposhtëm). Investimet e larta në ndërtesa në këtë periudhë pasqyrojnë investime në projekte të mëdha infrastrukturore dhe zhvillimit të qendrave të reja tregtare. Ky “boom” pasoi një rënie të menjëhershme në 28.6 mln lekë në 2017, kur disa nga këto projekte u përfunduan ose u vonuan.
Ecuria e investimeve në ndërtesa për periudhën 2010–2023 tregon një histori të ndërlikuar me luhatje, që reflekton ciklet ekonomike, ndikimet e investimeve publike dhe private, si dhe ndryshimet në financimet e jashtme. Nga 2018 në 2019, investimet u mbajtën afërsisht në nivelin e 40 mld lekëve, duke treguar një stabilizim të sektorit. Vitet e para të pandemisë sollën një tkurrje në 33.4 mld lekë në 2020, por 2021 shënoi një rimëkëmbje në 40.7 mld lekë, falë rifillimit të projekteve të nisura dhe lehtësirave fiskale ndaj hoteleve.
Në vitin 2023 investimet e bizneseve në ndërtesa ranë duke reflektuar sfidat e financimit për shkak të tensioneve inflacioniste dhe hezitimit të bankave për të kredituar për projekte të reja. Nga ana tjetër investimet e bizneseve në toka janë një tregues i interesit për zgjerim dhe ndërtim në të ardhmen. Investimet në toka në 2023 shënuan rënie në raport me vitet 2021 dhe 2022, por ato janë më të larta se mesatarja e dekadës së kaluar.
Investimet në toka në njëjtën periudhe krahasimi kishin vlerën më të lartë në vitin 2022 me më shumë se 22 miliardë lekë. Modeli i zhvillimit në kulla në Tiranë dhe hotele në bregdet po mban të “lidhura” bizneset rreth sektorit të ndërtimit edhe për vitet në vijim./ Monitor
