Në kulmin e protestave kundër projektit turistik në Zvërnec, kryeministri Edi Rama ka mbërritur këtë të premte në...
SPORT
Kriza diplomatike para Botërorit, Irani merr në minutat e fundit dritën jeshile për vizat amerikane
PiranjatPërditësimi i fundit 5 Qershor 2026, 20:28
Pak ditë para nisjes së Botërorit 2026, një nga krizat më të mëdha jashtë fushës së lojës ka gjetur zgjidhje në momentet e fundit. Kombëtarja e Iranit ka marrë miratimin për vizat amerikane, duke shmangur rrezikun real të mosparaqitjes në ndeshjet e fazës së grupeve që do të zhvillohen në Shtetet e Bashkuara.
Prej ditësh, delegacioni iranian ishte bllokuar në Ankara të Turqisë, ku lojtarët dhe stafi teknik kishin dorëzuar pasaportat pranë Ambasadës Amerikane në pritje të procedurave për hyrjen në SHBA. Situata kishte krijuar shqetësim të madh, pasi koha po ngushtohej dhe skuadra nuk kishte ende autorizimin e nevojshëm për të hyrë në territorin amerikan.
Paradoksi i situatës ishte se Irani kishte të rregullta vizat dhe bazën stërvitore në Meksikë, ku kishte planifikuar të përgatitej për turneun. Megjithatë, shorti i Botërorit kishte përcaktuar që të tre ndeshjet e Grupit G ndaj Zelandës së Re, Belgjikës dhe Egjiptit të zhvilloheshin në Los Angeles dhe Seattle, duke e bërë të domosdoshme pajisjen me vizë amerikane.
Me afrimin e turneut dhe rrezikun e një skandali ndërkombëtar që mund të përfshinte edhe FIFA-n, çështja kaloi në nivele të larta diplomatike. Sipas njoftimit zyrtar të Shtëpisë së Bardhë, vizat për delegacionin iranian janë miratuar dhe lëshuar, duke i dhënë fund pasigurisë që kishte shoqëruar skuadrën javët e fundit.
Pas vendimit, Kombëtarja e Iranit pritet të udhëtojë këtë të shtunë drejt Meksikës për të vijuar fazën përgatitore, ndërsa debutimi i saj në Botërorin 2026 është planifikuar më 15 qershor.
Zgjidhja e ngërçit shmang një precedent të paprecedentë në historinë moderne të Kupës së Botës, ku një kombëtare e kualifikuar rrezikonte të mbetej jashtë jo për arsye sportive, por për shkak të pengesave diplomatike dhe burokratike.
