Qytetarët në Serbi votojnë sot në zgjedhjet e parakohshme parlamentare, në një klimë të tensionuar politike, pas prote...
SPORT
Mbyllet Rrethi i 83-të Çiklistik, fiton holandezi Reemeijer por me Shqipërinë që gëzon në etapën e fundit
PiranjatPërditësimi i fundit 23 Maj 2026, 13:22
Pasi e kishte “prenotuar” fanellën e verdhë me suksesin në Vlorë, Niels Reemeijer e ka certifikuar fitoren e Rrethit të 83-të Çiklistik në etapën Vlorë-Fier (122.8km), ku dhe u shënua zyrtarisht mbyllja e garës.
Etapa e djeshme fushore nuk solli ndryshime të rëndësishme në klasifikim, ndërsa festa e madhe i takoi holandezit të skuadrës Wielerploeg Groot Amsterdam, i cili e mbylli si kampion Rrethin e 83-të Çiklistik të Shqipërisë, me 10 sekonda avantazh nga zvicerani Guillaume Haldimann (Humard VP) në klasifikimin e përgjithshëm. Podiumi u plotësua nga Burak Abay, çiklist i Turqisë, i klasifikuar në vendin e tretë. Kështu, për të dytin edicion radhazi, Rrethi i Shqipërisë fitohet nga një çiklist holandez, teksa një vit më parë triumfonte Tom Jonkmans.
ETAPA E PESTË – Ndërkohë Shqipëria mundi të përjetojë gëzimin e parë në këtë edicion, duke fituar në parakalimin tradicional të etapës së fundit. Kështu, italo-shqiptari Gabriele De Fabritiis triumfoi dje në etapën e pestë, Vlorë-Fier, duke ngjitur për herë të parë në podium Shqipërinë. Por, për sa i përket klasifikimit të përgjithshëm, De Fabritiis e mbylli në vendin e 27-të me diferencë 8 minuta e 2 sekonda nga kreu.
CEREMONIA DHE VERDIKTET – Në përfundim të aktivitetit, Skënder Anxhaku, president i Federatës Shqiptare të Çiklizmit, në bashkëpunim me Bashkinë Fier nderuan më të mirët e edicionit të 83-të të aktivitetit.
Kështu, verdiktet finale të Rrethit të 83-të Çiklistik shpallën kampion holandezin Niels Reemeijer, i cili e mbylli me fanellën e verdhë në podium. Fanella e jeshile e klasifikimit të pikëve u fitua nga Georgios Bouglas i Greqisë. Fanella me pikë e maloristit më të mirë shkoi për Halil Ibrahim Dogan të Turqisë, ndërsa fanella e bardhë për të riun më të mirë të aktivitetin u fitua nga Jip Schouren. Skuadra Wielerploeg Groot Amsterdam u shpall kampione ekipore e Rrethit, ndërsa Shqipëria e mbylli në vendin e 16-të, duke lënë pas vetëm Kosovën.
Por, FSHÇ mund të krenohet më organizimin e një aktiviteti që përveç aspektit sportiv është gjithashtu promovues i turizmit dhe i bukurive natyrore të vendit tonë. Kujtojmë se që prej vitit 2017, Rrethi Çiklistik i Shqipërisë është pjesë e kalendarit të garave të UCI-t.
Reemeijer: Duhej vetëm të mbroja Në pjesëmarrjen e tij të tretë në Rrethin Çiklistik të Shqipërisë, Niels Reemeijer arriti që të kurorëzohet me titullin e parë kampion në këtë event. Holandezi i skuadrës Wielerploeg Groot Amsterdam u shfaq shumë i lumtur me paraqitjen dhe rezultatin e arritur, teksa pas suksesit në Fier, ndër të tjera deklaroi: “Sot (dje) shkoi mirë, sepse nuk ishte një etapë shumë e fortë. Më duhej vetëm të mbroja fanellën e kampionit për suksesin. Më pëlqen Shqipëria, moti është i mirë. Kjo është hera ime e tretë që e bëj këtë garë. Më pëlqen shumë këtu dhe shpresoj të kthehem sërish”, u shpreh fituesi i edicionit të 83-të në Rrethin Çiklistik të Shqipërisë.
De Fabritiis: Jo në gjendjen më të mirë, por besova Një vit më parë fitonte fanellën e bardhë e të riut më të mirë, ndërsa këtë edicion Gabriele De Fabritiis e mbyll me festë simbolike, duke fituar etapën e pestë, Vlorë-Fier, në Rrethin Çiklistik. Pas garës, çiklisti i Shqipërisë foli për aktivitetin dhe fitoren e regjistruar në Fier, teksa ndër të tjera u shpreh: “Ndihem shumë mirë, ishte një xhiro shumë e vështirë. Gjithë gara shkoi mirë edhe pse nuk kam qenë në kushtet më të mira fizike, besova te ekipi dhe vetja. Nuk ishte një rivalitet i keq, po sportiv”, deklaroi italo-shqiptari Gabriele De Fabritiis.
