Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
SPORT
Prej ditësh i shtruar në spital, flet Agustin Kola: Jam mirë, ju dua shumë të gjithëve
PiranjatPërditësimi i fundit 22 Tetor 2025, 14:30
Prej disa ditësh i gjithë kryeqyteti, ambienti sportiv dhe jo vetëm, zien për lajmin që lidhet me gjendjen shëndetësore të një prej ikonave të futbollit të Tiranës dhe kombëtares shqiptare, si Agustin Kola.
Edhe pse në moshën 66-vjeçare emri i Kolës mbetet historikisht i lidhur me sportin, vitet pasi e la futbollin e luajtur ai nuk u shkëput asnjëherë nga aktiviteti sportiv, si për të treguar se e kishte të vështirë t’i thoshte stop, përgatitjes së lartë sportive pavarësisht viteve që shkojnë, deri sa ishte trupi që i dha një sinjal.
Në një intervistë për Top Channel, Agustin Kola i sapo dalë prej reanimacionit, por ende i shtruar në QSUT, mesazhin e parë e ka për tifozët dhe miqtë që janë interesuar kaq shumë.
“Të them të drejtën i dua shumë, jam shumë mire, këto lot më shkojnë nga gëzimi, ju dua shumë, janë lot gëzimi jo dhimbjeje. Pa ju ça do isha unë…”, thotë Kola.
Shenjat filluan rreth 13 ditë më parë që e detyruan Agustin Kolën të kalonte nën kujdesin e trajtimit intensive të mjekëve pranë qendrës spitalore universitare “Nënë Tereza”.
“Gjendja ime është shumë e mirë dhe të them të drejtën edhe doktorët janë shumë të mirë, nga infermieret, pastrueset nga të gjithë. Nuk jam tip servili i them këto gjëra nga zemra. Të them të drejtën gatitu më kanë qëndruar, më kanë njohur, kemi qëndruar e kemi biseduar, por ndonjëherë edhe fjala të shëron”, shprehet ai..
Po çfarë realisht e solli njeriun e ashtuquajtur të hekurt dhe të pandarë me sportin, në dyert e terapisë intensive?
“Kisha një shqetësim stomakun prandaj duhet të bëjmë kujdes me ushqimet edhe pse unë nuk kam ndonjë ngarkesë të madhe. Kam pas ngarkesa me sportin, por përsëri sporti është i bukur, të jep jetë.”
Më the që ke lajme të mira nga doktori dhe dalëngadalë po bëhesh gati të dalësh…?
Mos të them që jam gati për ndeshje.
Dhe mesazhin e fundit padyshim që Agustin Kola e ka për ata që i përkëdhelën sedrën gjatë gjithë karrierës së tij dhe që ende edhe sot i ka pranë, “Tifozët e Tironës”, siç ka dëshirë ai t’i konsiderojë.
“I dua shumë tifozët dhe e dini që dua t’ju shoh aty në krye, këtë e flas me shpirt”, tha legjenda i Tiranës.
