Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
SPORT
Si të riktheni dëshirën për palestër pas një pushimi të gjatë
PiranjatPërditësimi i fundit 19 Shtator 2025, 18:22
Midis angazhimeve në punë, takimeve, detyrimeve familjare dhe aktiviteteve shoqërore, ideja për të shtuar edhe stërvitjen në axhendën tuaj mund të duket si një sfidë më vete. Sidomos pas festave, ku "pauza" nga aktiviteti fizik shpesh zgjatet më shumë seç ishte parashikuar.
Nëse dëshironi të riktheheni në rutinën tuaj atletike por po hasni vështirësi, ndiqni këto këshilla praktike nga Nikos Chrysafis, trajner personal, për një rifillim të suksesshëm.
1. Mos e ndëshkoni veten
Mos e kritikoni veten për pauzën që keni bërë. Nuk ka rëndësi se kur do të kishte qenë "koha ideale" për të rifilluar, ajo është tani. Shumë njerëz, për të kompensuar kohën e humbur, i drejtohen stërvitjeve të gjata dhe intensive, por kjo nuk është zgjidhje. E vetmja gjë që mund të arrini me 2-3 orë në pistën e vrapimit është ndoshta një dëmtim, jo një rikthim më i shpejtë në formë. Merreni me qetësi dhe mos e tepron
2. Lëreni peshoren
Po, e di, ndoshta nuk jeni më aty ku dëshironit të ishit. Por kontrolli i vazhdueshëm i peshës vetëm sa shton stresin dhe zhgënjimin. Dhe shpesh, kur ndihemi keq, kthehemi te ushqimi për ngushëllim. Pranojeni ku jeni tani dhe caktoni një qëllim realist. Po ashtu, shmangni pajisjet që matin kaloritë apo aktivitetin fizik në mënyrë të pasaktë, ato më shumë mund t’ju shkaktojnë frustrim sesa t’ju ndihmojnë.
3. Filloni me dietën
Përpara se të hidheni në një program të plotë stërvitjeje, filloni me zakone të shëndetshme në tryezë. Pini shumë ujë, shtoni më shumë fruta dhe perime në dietën tuaj, kujdesuni për të pasur proteina të mjaftueshme në çdo vakt, si dhe kufizoni ushqimet e përpunuara dhe alkoolin.
4. Bëni hapa të vegjël, por të qëndrueshëm
Mos u përpiqni të bëni gjithçka menjëherë. Filloni me 10 minuta ecje në ditë për javën e parë dhe rriteni gradualisht kohën çdo javë. Nëse jeni më të avancuar, mund të rifilloni me stërvitje të shkurtra 10-15 minuta. Pjesëmarrja në aktivitetet e fëmijëve apo miqve është gjithashtu një mënyrë argëtuese për t’u rikthyer në formë.
5. Mos harroni të pushoni dhe të kujdeseni për veten
Pushimi është pjesë e rëndësishme e rikuperimit. Shtrirja pas stërvitjes, pushimet e shkurtra gjatë sesioneve të aktivitetit dhe relaksimi pas tyre (si një dush i ngrohtë ose masazh i lehtë), ndihmojnë trupin të përshtatet dhe të mos lodhet. Gjumi i mirë dhe shmangia e vakteve të rënda para gjumit janë gjithashtu çelës për një rikthim të suksesshëm. Pini ujë gjatë gjithë ditës dhe mos harroni se kujdesi për trupin fillon nga rutina e përditshme.
