Ish-ministri i Jashtëm, Ditmir Bushati ka reaguar për herë të parë në lidhje me protestat masive të të rinjve dhe qyteta...
SOCIALE
Indentikiti i kandidatit të opozitës për Bashkinë e Tiranës!
PiranjatPërditësimi i fundit 17 Shtator 2025, 20:56
Nga Bledian Koka
Ogerta Manastirliu është kandidatja më e dobët që Partia Socialiste mund të zgjidhte për Kryetare të Bashkisë së Tiranës, por sfida është aty! Pyetja e madhe është: me cilin kandidat do t’i përgjigjet opozita këtij dueli?
Për një definicion banal të instaluar në Shqipëri, zgjedhjet e pjesshme lokale, kurdo që kanë ndodhur, në përgjithësi fitohen nga mazhoranca në qeveri, cilado qoftë ajo. Por, rasti i Tiranës është specifik, sepse kurrë më parë nuk ka ndodhur që një kryetar bashkie të lërë mandatin në mes në këto 34 vitet e fundit, kështu që edhe e panjohura është akoma më e madhe.
Në zgjedhjet e 11 majit që lamë pas, Partia Socialiste arriti të merrte në Tiranë 230.100 vota, ndërsa Partia Demokratike 164.300 vota. Pra, diferenca është 65 mijë vota. Ama, nëse u shtojmë votave të opozitës edhe 23.600 votat e “Mundësia”, 16.500 votat e “Shqipëria Bëhet”, 13.300 votat e “Bashkë” dhe 5.815 votat e “Djathtas për Zhvillim”, diferenca mes forcave opozitare dhe Edi Ramës në Tiranë është vetëm 6.400 vota!
Për një betejë elektorale pa kompromis, por me bonus politik, ajo që ka ndodhur më 11 maj në Tiranë është një prelud real që, me ftohjen e kokave të opozitës, mundësia për t’i dhënë një goditje të fortë Edi Ramës mu në zemër të pushtetit të ri politik e ekonomik është mëse e mundur. Madje është më shumë: është nevojë kombëtare!
Ka dy rrugë për t’u përballur me Edi Ramën në Tiranë.
E para dhe më e mundshmja është që PD dhe aleatët të propozojnë një kandidat politik, çka është e logjikshme për të vijuar betejën sipas verbit politik se “me Edi Ramën kryeministër, vendi nuk ka e nuk do të ketë zgjedhje të lira”. Një mundësi e dytë është krijimi i një fronti opozitar të logjikshëm, ku askush nuk humbet asgjë nga identiteti politik, por fitohet qasja me qytetarin, nevoja për të mbrojtur qytetin dhe mundësia për t’i dhënë një goditje të fortë regjimit.
Ndonjëherë zgjedhjet më të vështira janë ato më të thjeshtat. Për t’u parë është vullneti i gjithsecilit. Edi Rama e ka shpalosur të vetin!
