Sot vendi ynë do të jetë nën ndikimin e masave ajrore relativisht të qëndrueshme dhe të nxehta.
Moti parashikohet kryesish...
AKTUALITET
"AKU ka dështuar," Resuli: Në Kroaci është kapur një ngarkesë me speca me përmbajtje shumë të lartë pesticidesh nga Shqipëria! Jemi të ekspozuar dhe në rrezik serioz
n.fPërditësimi i fundit 2 Prill 2025, 20:52
TIRANË- Kreu i Shoqatës për Mbrojtjen e Konsumatorit dhe Prodhuesit, Ervin Resuli përmes një postimi në "Facebook" ka reaguar në lidhje me skandalet e njëpasnjëshme të cilat kanë tronditur konsumatorët shqiptarë për cilësinë ushqimore në vend. Resuli në reagimin e tij shkruan se Autoriteti Kombëtar i Ushqimit, AKU ka dështuar disa herë në mënyrë të vazhdueshme, sistematike dhe shqetësuese. Sipas tij AKU nuk është një institucion funksional por një institucion ku të gjithë janë të interesuar për xhepin e vet.
Më tej Resuli ka shpalosur një tjetër problematikë që është hasur me prodhimet e vendit tonë. Pas mandarinave mësohet se në Kroaci është kapur një ngarkesë me speca nga Shqipëria, me përmbajtje shumë të lartë pesticidesh. Sipas tij kjo ngarkesë është klasifikuar me rrezik të lartë për konsumatorin. Ai shtoi se deri më tani nuk ka asnjë njoftim nga AKU. Resuli thekson se Shqipëria është e ekspozuar dhe në rrezik serioz. Sipas tij vendin ka nevojë për një plan kombëtar për sigurinë ushqimore dhe jo drejtorë të rastit dhe emërime qokash.
AKU KA DËSHTUAR – DHE KY NUK ËSHTË RASTI I PARË! Autoriteti Kombëtar i Ushqimit (AKU) ka dështuar – jo një herë, por në mënyrë të vazhdueshme, sistematike dhe shqetësuese. Në vend që të garantojë sigurinë ushqimore të qytetarëve shqiptarë, skandali mbulon skandalin dhe heshtja institucionale është bërë normë. Pse? Sepse ndoshta aty nuk kemi më një institucion funksional, por një “mejhané” të madhe, ku gjithkush është më i interesuar për xhepin e vet apo për t’i shërbyer “shefit” që i ka gradë.
*Ndërkohë, Shqipëria ndodhet nën një valë alarmante të rasteve me Salmonella, ku përgjegjësia bie drejtpërdrejt mbi Ministren e Bujqësisë, AKU-n dhe ISUV-in – tre institucione që duhet të funksionojnë të koordinuara për të mbrojtur shëndetin tonë dhe të fëmijëve tanë. Por çfarë bëjnë këto institucione? Shndërrohen në megafonë të fushatës elektorale – like & share, në vend që të jenë në krye të detyrës!
Dhe sikur të mos mjaftonte kjo: Më datë 12 Mars, përmes sistemit të alarmeve të shpejta të BE-së (RASFF), në Kroaci është kapur një ngarkesë me speca nga Shqipëria, me përmbajtje shumë të lartë pesticidesh – të klasifikuara me rrezik të lartë për konsumatorin. Deri më sot, nuk kemi asnjë informacion zyrtar: Kush i ka importuar këto speca? Ku janë shpërndarë ato? A janë ende në treg? Çfarë masash janë marrë? A po i hamë ne këto speca, ashtu siç hëngrëm mandarinat me pesticide?
Faqja zyrtare e AKU-së nuk ka asnjë njoftim. Ministrja del në televizor dhe flet për transparencë, ndërkohë që te faqja e internetit ska informacion publik . Institucioni që duhet të komunikojë rrezikun me publikun – sipas çdo standardi evropian – ka dështuar me turp. Shqipëria është e ekspozuar dhe në rrezik serioz. Ne kemi nevojë për një PLAN KOMBËTAR për sigurinë ushqimore, jo drejtorë të rastit dhe emërime qokash. Siguria ushqimore nuk është luks – është jetike. Ndërkohë që ruhemi nga Salmonela, a po hamë speca me pesticide?
