Elisa Spiropali ka reaguar pas zgjedhjeve në Serbi, ku Lista e Studentëve fitoi përballë Alexandar Vuçiç.
Deputetja sociali...
AKTUALITET
Arratisja e Altin Ndocit nga spitali i Durrësit, Prençi: Ministri Manja ka mbushur burgjet me patronazhistë!
PiranjatPërditësimi i fundit 14 Janar 2026, 14:56
Burgjet janë mbushur me patronazhistë dhe nuk zbatohet asnjë standard institucional apo sigurie, që nga emërimet dhe deri tek sistemi i burgjeve dhe trajtimi i të dënuarve dhe të paraburgosurve.
Kështu u shpreh sot ish-kryepolici Shemsi Prençi, ku komentoi dhe analizoi ngjarjen e ndodhur dje në spitalin e Durrësit, ku u arratis i paraburgosuri i rrezikshëm Altin Ndoci, i akuzuar për disa vrasje nga SPAK.
Prençi tha gjithashtu se ai i kishte denoncuar në mënyrë të vazhdueshme shkatërrimin e sistemit të burgjeve ndër vite dhe aktualisht.
“Në mënyrë permanente kam denoncuar shkatërrimin e sistemit të burgjeve, trajtimit të të burgosurve aty, drejtimin e institucionit. Kam denoncuar se në Burgun e Lezhës futen për takime speciale masazhatore për të burgosur VIP dhe për të dënuar vrasës. Në burgje ka trajtime speciale për të burgosurit VIP. Shmangia e procedurave krijon lehtësi për arratisjet. Kontrollin dhe recetën e bën doktori dhe as infermieri apo mjeku”, tha ai mes të tjerash.
Ish-kandidati për deputet, njëkohësisht edhe ish-kreu i Emergjencave Civile, shpjegoi dhe atë që ka ndodhur me sistemin e burgjeve, duke bërë përgjegjës edhe ministrin e Drejtësisë, Ulsi Manja, që e ka politizuar institucionin, duke ulur profesionalizmin. Madje ai bëri edhe metaforë duke krahasuar “gomerët me kuajt”.
“Institucionet shtetërore janë mbushura me patronazhistë. Duhet thënë se sistemi i drejtim-komandimit është me patronazhistë dhe kështu ndodh kur vendos që të drejtojë punën gomari në vend të kalit. Ka patronazhistë pa eksperiencë në drejtimin e burgjeve, nuk respektohen procedurat standarde me të burgosurit, sigurimi për shoqërimin me trupa sigurie, niveli i sigurimit, siç ishte niveli i sigurisë dje në Spitalin e Burgut. Ministri i drejtësisë në veçanti, Ulsi Manja, ka shërbyer si katalizator për të mbushur sistemin e burgjeve me patronazhistë. Nuk përmbushen as kushtet e sigurisë për të paraburgosurit”, komentoi Prençi.
Ai ngriti edhe shqetësimin për protokollin e kontrolleve mjekësore të të burgosurve, raportet që lëshohen dhe masat e sigurisë.
Ish-kryepolici kërkoi verifikimin e të gjithë dokumentacionit dhe dinamikës institucionale të ndjekur, sepse raportet i lëshon vetëm doktori dhe jo infermieri.
“Unë e kam denoncuar disa herë edhe mënyrën se si veprohet me rastet e trajtimit, në çështjen aktuale duhet parë a e ka dhënë rekomandimin doktori për trajtim, Pra a janë zbatuar procedurat standarde, sepse vetëm doktori e bën dhe shmangia e tyre sjell arratisjet si ajo në spitalin e Durrësit. Por edhe masat e sigurisë lënë për të dëshiruar. Sepse nëse do ishte i sëmurë, nuk mund të vraponte me vrap në atë mënyrë. Nuk mund të çohet me pranga të shkurtra në spital, por me zinxhir të gjatë, që rrit standardin e sigurisë dhe pengon arratisjen. Duhet të ketë pasur edhe plan arratisje, por kjo duhet parë. Ajo që duhet theksuar është se ka shkelje të procedurës standarde si për dërgim në spital, ashtu edhe në sallën e gjyqit. Këtu nuk është zbatuar asnjë procedurë”, tha ai.
