Në një deklaratë për mediat, zëdhënësja e Antikorrupsionit në Partinë Demokratike, Genta Vangjeli denoncoi kredin...
AKTUALITET
VIDEO/ Banorët e Spitallës denoncojnë qarkullimin e mjeteve të rënda pranë banesave: Jetojmë çdo ditë mes zhurmës dhe rrezikut!
Nga Xhuljan FerzajPërditësimi i fundit 26 Qershor 2026, 13:01
Banorët e Lagjes 15 në zonën e Spitallit, Durrës, kanë ngritur një denoncim publik lidhur me një problematikë që, sipas tyre, po rëndon prej kohësh jetën e përditshme të komunitetit. Ata shprehen për “Piranjat News” se aktiviteti i një firme që merret me transportin dhe grumbullimin e kromit po shkakton shqetësime të vazhdueshme për shkak të lëvizjes së mjeteve të tonazhit të rëndë pranë banesave.
Sipas denoncimit, trailerat qarkullojnë në afërsi të shtëpive me shpejtësi të lartë, duke krijuar zhurmë të konsiderueshme dhe duke rritur shqetësimin e banorëve, të cilët thonë se përballen me këtë situatë në çdo orë të ditës.
Banorët bëjnë me dije se nuk është hera e parë që e ngrenë këtë problem. Ata deklarojnë se kanë paraqitur ankesa verbale, si edhe peticione të shoqëruara me firma dhe materiale fotografike, duke kërkuar ndërhyrjen e institucioneve përgjegjëse. Megjithatë, sipas tyre, deri më tani nuk është marrë asnjë masë konkrete, ndërsa përgjegjësia është kaluar vazhdimisht nga një institucion te tjetri.
Në kërkesën e tyre, banorët i bëjnë thirrje institucioneve kompetente që të shqyrtojnë me seriozitet situatën dhe të kryejnë verifikimet e nevojshme në terren, me qëllim gjetjen e një zgjidhjeje sa më të shpejtë.
Ata theksojnë se situata po ndikon drejtpërdrejt në cilësinë e jetës së komunitetit dhe kërkojnë një reagim institucional, duke shpresuar në marrjen e masave konkrete për garantimin e qetësisë dhe sigurisë në zonën ku banojnë.
Mesazhi i qytetares:
Ju shkruaj në cilësinë e një banori të Lagjes 15, Spitall, Durrës, për t'ju paraqitur një problematikë tepër shqetësuese, e cila prej kohësh po ndikon negativisht në jetën e banorëve të kësaj zone.
Në afërsi të banesave tona ushtron aktivitet një firmë që merret me transportin dhe grumbullimin e kromit. Mjetet e tonazhit të rëndë (trailerat) qarkullojnë pranë shtëpive me shpejtësi të lartë, duke shkaktuar zhurmë të konsiderueshme dhe shqetësime të vazhdueshme në çdo orë të ditës.
Këtë problem e kemi ngritur disa herë si komunitet, si verbalisht, ashtu edhe përmes peticioneve, të shoqëruara me firma dhe materiale fotografike. Megjithatë, deri më sot nuk kemi marrë asnjë zgjidhje konkrete dhe përgjegjësia është kaluar vazhdimisht nga një institucion te tjetri.
Ju lutemi ta shqyrtoni me seriozitet këtë rast dhe të ndërmerrni verifikimet e nevojshme për të gjetur një zgjidhje sa më të shpejtë. Banorët e zonës po përballen çdo ditë me këtë situatë dhe presin një reagim institucional, me shpresën se do të merren masa konkrete për zgjidhjen e këtij problemi./Piranjat News
